Read Papantla Totonac Salmonan 119 Bible Online

Salmonan 119 - Papantla Totonac bible

Salmonan 119

¹Bendishona ta esnan ku nan kaminda ta sin mancha, ku ta kana den e lei di SENOR.

²Bendishona ta esnan ku ta warda Su testimonionan, ku ta busk'E ku henter nan kurason;

³tampoko nan no ta hasi inhustisia; nan ta kana den Su kamindanan.

⁴Bo a ordena Bo preseptonan pa nos kumpli ku nan ku diligensia.

⁵O ku mi kamindanan por wordu stablesi, pa warda Bo statutonan!

⁶E ora ei lo mi no keda brongosa, ora mi paga tino na tur Bo mandamentunan.

⁷Lo mi dunaBo gradisimentu ku rektitut di kurason, ora mi sina Bo huisionan hustu.

⁸Lo mi warda Bo statutonan; no bandonami kompletamente!

⁹Kon un hoben por tene su kaminda puru? Dor di mantene esei segun Bo palabra.

¹⁰Ku henter mi kurason mi a buskaBo; no lagami desvia for di Bo mandamentunan.

¹¹Bo palabra mi a skonde den mi kurason, pa mi no peka kontra Bo.

¹²Bo ta bendishona, O SENOR; sinami Bo statutonan.

¹³Ku mi lepnan mi a deklara tur e ordenansanan di Bo boka.

¹⁴Mi a regosiha den e kaminda di Bo testimonionan, meskos ku den tur rikesa.

¹⁵Lo mi medita den Bo preseptonan, i konsidera Bo kamindanan.

¹⁶Lo mi tin delisia den Bo statutonan; lo mi no lubida Bo palabra.

¹⁷Hasi bon na Bo sirbido, pa mi por biba i warda Bo palabra.

¹⁸Habri mi wowo, pa mi por kontempla kosnan maraviyoso for di Bo lei.

¹⁹Mi ta un stranhero riba tera; no skonde Bo mandamentunan pa mi.

²⁰Mi alma ta muri di anhelo pa Bo ordenansanan na tur momento.

²¹Bo ta reprende e arogantenan, esnan maldishona, ku ta desvia for di Bo mandamentunan.

²²Kita reproche i menospresio for di mi, pasobra mi ta warda Bo testimonionan.

²³Maske prensnan sinta papia kontra mi, Bo sirbido ta medita den Bo statutonan.

²⁴Bo testimonionan tambe ta mi delisia i mi konseheronan.

²⁵Mi alma ta pega duru na stof; rebibami segun Bo palabra.

²⁶Mi a konta di mi kamindanan i Bo a kontestami; sinami Bo statutonan.

²⁷Hasimi komprende e kaminda di Bo preseptonan; asina lo mi medita den Bo maraviyanan.

²⁸Mi alma ta yora di tristesa; fortalesemi segun Bo palabra.

²⁹Kita e kaminda di mentira for di mi, i den Bo miserikordia, dunami Bo lei.

³⁰Mi a skohe e kaminda di fieldat; Bo ordenansanan mi a pone mi dilanti.

³¹Mi ta tene duru na Bo testimonionan; O SENOR, no ponemi na berguensa!

³²Lo mi kore riba e kaminda di Bo mandamentunan, pasobra Abo lo engrandese mi kurason.

³³Sinami, O SENOR, e kaminda di Bo statutonan, i lo mi warda esei te na fin.

³⁴Dunami komprendementu, pa mi por warda Bo lei i kumpli kune ku henter mi kurason.

³⁵Hasimi kana den e bereha di Bo mandamentunan, pasobra mi tin delisia den dje.

³⁶Inklina mi kurason na Bo testimonionan, i no na ganashi desonesto.

³⁷Kita mi bista for di banidat; i rebibami den Bo kamindanan.

³⁸Kita for di mi e reproche ku mi ta teme, pasobra Bo ordenansanan ta bon.

³⁹Mira, mi ta anhela na Bo preseptonan; rebibami pa medio di Bo hustisia.

⁴⁰Laga Bo miserikordia tambe bin na mi, O SENOR,

⁴¹Bo salbashon segun

⁴²Bo palabra; asina lo mi tin un kontesta pa esun ku ta reprochami, pasobra mi ta konfia den Bo palabra.

⁴³no kita e palabra di berdat kompletamente for di mi boka, pasobra mi speransa ta den Bo ordenansanan.

⁴⁴Asina lo mi warda Bo lei kontinuamente, pa semper i semper.

⁴⁵lo mi kana den libertat, pasobra mi ta buska Bo preseptonan.

⁴⁶Tambe lo mi papia di Bo testimonionan dilanti di reinan, i lo no tin berguensa.

⁴⁷lo mi tin delisia den Bo mandamentunan ku mi ta stima.

⁴⁸I lo mi halsa mi mannan na Bo mandamentunan ku mi ta stima; i lo mi medita den Bo statutonan.

⁴⁹Korda e palabra duna na Bo sirbido, den kual Bo a hasimi spera.

⁵⁰Esaki ta mi konsuelo den mi aflikshon, ku ta Bo palabra a rebibami.

⁵¹E arogantenan a hasi masha bofon di mi; tog mi no ta desvia for di Bo lei.

⁵²Mi a korda Bo ordenansanan di prome aya, O SENOR, i mi ta konsola mi mes.

⁵³Indignashon a garami pa motibu di e malbadonan ku ta bandona Bo lei.

⁵⁴Bo statutonan ta mi kantikanan den e kas di mi peregrinashon.

⁵⁵O SENOR, anochi mi ta korda riba Bo nomber i ta warda Bo lei.

⁵⁶Asina a sosode ku mi, pasobra mi ta warda Bo preseptonan.

⁵⁷SENOR ta mi porshon; mi a priminti di warda Bo palabranan.

⁵⁸Mi a buska Bo fabor ku henter mi kurason; tene miserikordia di mi segun Bo palabra.

⁵⁹Mi a pensa bon tokante di mi kamindanan, i a dirigi mi pianan na Bo testimonionan.

⁶⁰Mi a pura i no a tarda pa warda Bo mandamentunan.

⁶¹E lasonan di e malbadonan a rondonami, ma mi no a lubida Bo lei.

⁶²Mei anochi lo mi lanta pa dunaBo gradisimentu, pa motibu di Bo ordenansanan hustu.

⁶³Mi ta kompanero di tur esnan ku ta temeBo, i di esnan ku ta warda Bo preseptonan.

⁶⁴Tera ta yen di Bo miserikordia, O SENOR; sinami Bo statutonan.

⁶⁵Bo tabata bon pa Bo sirbido, O SENOR, segun Bo palabra.

⁶⁶Sinami bon disernimentu i konosementu, pasobra mi ta kere Bo mandamentunan.

⁶⁷Prome ku mi a wordu afligi, mi a desvia, ma awor mi ta warda Bo palabra.

⁶⁸Bo ta bon i ta hasi bon; sinami Bo statutonan.

⁶⁹E arogantenan a saka mentira kontra mi; ku henter mi kurason lo mi warda Bo preseptonan.

⁷⁰Nan kurason ta tur tapa ku vet, ma ami tin delisia den Bo lei.

⁷¹Ta bon pa mi ku mi a wordu afligi, pa mi por sina Bo statutonan.

⁷²E lei di Bo boka ta miho pa mi ku miles di pida oro i plata.

⁷³Bo mannan a trahami i a formami; dunami komprendementu, pa mi sina Bo mandamentunan.

⁷⁴Laga esnan ku ta temeBo mirami i keda kontentu, pasobra mi speransa ta den Bo palabra.

⁷⁵Mi sa, O SENOR, ku Bo huisionan ta hustu, i ku den fieldat Bo a afligimi.

⁷⁶Laga Bo miserikordia konsolami, segun Bo palabra na Bo sirbido.

⁷⁷Laga Bo kompashon bin riba mi, pa mi por biba, pasobra Bo lei ta mi delisia.

⁷⁸Laga e arogantenan keda brongosa, pasobra nan a kalumniami sin motibu, ma ami lo medita den Bo

⁷⁹Laga esnan ku ta temeBo bolbe serka mi, esnan ku konose Bo testimonionan.

⁸⁰Laga mi kurason ta perfekto den Bo statutonan, pa mi no keda brongosa.

⁸¹Mi alma ta muri di anhelo pa Bo salbashon; mi speransa ta den Bo palabra.

⁸²Mi wowonan ta faya di anhelo pa Bo palabra, bisando: "Ki ora lo Bo konsolami?"

⁸³Maske mi a bira manera un saku di kueru den huma, mi no ta lubida Bo statutonan.

⁸⁴Kuantu e dianan di Bo sirbido lo ta? Ki tempu lo Bo ehekuta huisio riba esnan ku ta persiguimi?

⁸⁵E arogantenan a koba buraku pa mi, lokual no ta konforme Bo lei.

⁸⁶Tur Bo mandamentunan ta fiel; ku mentira nan a persiguimi; yudami!

⁸⁷Nan a hera di kaba ku mi riba tera, ma pa loke t'ami, mi no a bandona Bo preseptonan.

⁸⁸Rebibami segun Bo miserikordia, pa asina mi warda e testimonio di Bo boka.

⁸⁹Pa semper, O SENOR, Bo palabra ta stablesi den shelu.

⁹⁰Bo fieldat ta di generashon pa generashon; Bo a stablese tera, i e ta keda para.

⁹¹Nan ta keda para te dia djawe segun Bo ordenansanan, pasobra nan tur ta Bo sirbidonan.

⁹²Si Bo lei no tabata mi delisia, lo mi a perese kaba den mi aflikshon.

⁹³Nunka lo mi lubida Bo preseptonan, pasobra pa medio di nan Bo a rebibami.

⁹⁴Mi ta di Bo, salbami, pasobra mi a buska Bo preseptonan.

⁹⁵E malbadonan ta wardami pa nan destruimi; lo mi konsidera Bo testimonionan.

⁹⁶Mi a mira un limite na tur perfekshon; Bo mandamentu ta sumamente amplio.

⁹⁷O kuantu mi ta stima Bo lei! E ta mi meditashon henter dia.

⁹⁸Bo mandamentunan ta hasimi bira mas sabi ku mi enemigunan, pasobra semper nan ta ku mi.

⁹⁹Mi tin mas komprendementu ku tur mi sinadonan, pasobra Bo testimonionan ta mi meditashon.

¹⁰⁰Mi ta komprende mas ku e bieunan, pasobra mi a warda Bo preseptonan.

¹⁰¹Mi a detene mi pianan for di tur mal kaminda, pa mi por warda Bo palabra.

¹⁰²Mi no a desvia for di Bo ordenansanan, pasobra ta Abo mes a sinami.

¹⁰³Ki dushi Bo palabranan ta pa mi shel'i boka, mas dushi ku miel den mi boka!

¹⁰⁴For di Bo preseptonan mi ta hana komprendementu; pesei mi ta odia tur kaminda di mentira.

¹⁰⁵Bo palabra ta un lampi pa mi pia i un lus pa mi kaminda.

¹⁰⁶Mi a hura i lo mi konfirma esaki, ku lo mi warda Bo ordenansanan hustu.

¹⁰⁷Mi ta masha afligi mes; rebibami, O SENOR, segun Bo palabra.

¹⁰⁸Asepta, O SENOR, e ofrendanan boluntario di mi boka, i sinami Bo ordenansanan.

¹⁰⁹Mi bida ta kontinuamente na peliger; tog mi no ta lubida Bo lei.

¹¹⁰E malbadonan a pone un trampa pa mi; tog mi no a desvia for di Bo preseptonan.

¹¹¹Mi a ereda Bo testimonionan pa semper, pasobra nan ta e goso di mi kurason.

¹¹²Mi a inklina mi kurason pa kumpli ku Bo statutonan pa semper, si, te na fin.

¹¹³Mi ta odia esnan indesiso, ma mi ta stima Bo lei.

¹¹⁴Bo ta mi luga di skonde i mi eskudo; mi speransa ta den Bo palabra.

¹¹⁵Bai for di mi, boso, hasidonan di maldat, pa mi por warda e mandamentunan di mi Dios.

¹¹⁶Sostenemi segun Bo palabra, pa mi por biba, i no lagami keda na berguensa den mi speransa.

¹¹⁷Sostenemi, i lo mi ta sigur, i lo mi respeta Bo statutonan kontinuamente.

¹¹⁸Bo a rechasa tur esnan ku ta desvia for di Bo statutonan, pasobra nan engano ta en bano.

¹¹⁹Tur e malbadonan di mundu Bo a kita manera skuma; pesei mi ta stima Bo testimonionan.

¹²⁰Mi karni ta tembla di temor pa Bo, i mi tin miedu di Bo huisionan.

¹²¹Mi a hasi huisio i hustisia; no entregami na mi opresornan.

¹²²Para borg na fabor di Bo sirbido; no laga e arogantenan oprimimi.

¹²³Mi wowonan ta faya di anhelo pa Bo salbashon i pa Bo palabra hustu.

¹²⁴Trata ku Bo sirbido segun Bo miserikordia, i sinami Bo statutonan.

¹²⁵Mi ta Bo sirbido; dunami komprendementu, pa mi por konose Bo testimonionan.

¹²⁶Ta tempu pa SENOR aktua, pasobra nan a kibra Bo lei.

¹²⁷Pesei mi ta stima Bo mandamentunan mas ku oro, si, mas ku oro fini.

¹²⁸Pesei mi ta konsidera komo rekto tur Bo preseptonan tokante di tur kos; mi ta odia tur kaminda di mentira.

¹²⁹Bo testimonionan ta maraviyoso; pesei mi alma ta warda nan.

¹³⁰E habrimentu di Bo palabranan ta ilumina; e ta duna komprendementu na e simpelnan.

¹³¹Mi a habri mi boka hanchu i a suspira, pasobra mi tabatin asina un deseo pa Bo mandamentunan.

¹³²Mirami i tene miserikordia di mi, manera Bo sa hasi ku esnan ku ta stima Bo nomber.

¹³³Stablese mi pasonan den Bo palabra, i no laga ningun inikidat tin dominio riba mi.

¹³⁴Redimimi for di opreshon di hende, pa mi por warda Bo preseptonan.

¹³⁵Hasi Bo kara resplandese riba Bo sirbido, i sinami Bo statutonan.

¹³⁶Riunan di awa ta basha for di mi wowo, pasobra nan no ta warda Bo lei.

¹³⁷Bo ta hustu, O SENOR, i Bo huisionan ta rekto.

¹³⁸Bo a ordena Bo testimonionan den rektitut i den gran fieldat.

¹³⁹Mi zelo a kaba ku mi, pasobra mi atversarionan a lubida Bo palabranan.

¹⁴⁰Bo palabra ta puru, pesei Bo sirbido ta stim'e.

¹⁴¹Mi ta chikitu i despresia, tog mi no ta lubida Bo preseptonan.

¹⁴²Bo hustisia ta un hustisia eterno, i Bo lei ta berdat.

¹⁴³Aflikshon i angustia a bin riba mi; tog Bo mandamentunan ta mi delisia.

¹⁴⁴Bo testimonionan ta hustu pa semper; dunami komprendementu pa mi biba.

¹⁴⁵Mi a sklama ku henter mi kurason; kontestami, O SENOR! Lo mi warda Bo statutonan.

¹⁴⁶Mi a sklama na Bo; salbami, i lo mi warda Bo testimonionan.

¹⁴⁷Prome ku marduga mi ta lanta i ta pidi yudansa; mi speransa ta den Bo palabranan.

¹⁴⁸Mi wowo ta antisipa e wardanan di anochi, pa mi por medita den Bo palabra.

¹⁴⁹Tende mi bos segun Bo miserikordia; rebibami, O SENOR, segun Bo ordenansanan.

¹⁵⁰Esnan ku ta sigui tras di maldat ta hala serka; nan ta keda leu for di Bo lei.

¹⁵¹Abo ta serka, O SENOR, i tur Bo mandamentunan ta berdat.

¹⁵²For di prome aya mi a komprende for di Bo testimonionan, ku Bo a funda nan pa semper.

¹⁵³Mira mi aflikshon i reskatami, pasobra mi no ta lubida Bo lei.

¹⁵⁴Defende mi kaso i redimimi; rebibami segun Bo palabra.

¹⁵⁵Salbashon ta keda leu for di e malbadonan, pasobra nan no ta buska Bo statutonan.

¹⁵⁶Bo miserikordia ta grandi, O SENOR; rebibami segun Bo ordenansanan.

¹⁵⁷Mi persiguidonan i mi atversarionan ta hopi, tog mi no ta desvia for di Bo testimonionan.

¹⁵⁸Mi ta mira e traidonan i ta aborese nan, pasobra nan no ta warda Bo palabra.

¹⁵⁹Mira kon mi ta stima Bo preseptonan; rebibami, O SENOR, segun Bo miserikordia.

¹⁶⁰Bo palabra den Su totalidat ta berdat, i kada un di Bo ordenansanan hustu ta eterno.

¹⁶¹Prensnan ta persiguimi sin motibu, ma mi kurason ta teme Bo palabranan.

¹⁶²Mi ta regosiha ofer di Bo palabra, manera un hende ku ta hana gran botin.

¹⁶³Mi ta odia i ta detesta mentira, ma mi ta stima Bo lei.

¹⁶⁴Shete biaha pa dia mi ta alabaBo, pa motibu di Bo ordenansanan hustu.

¹⁶⁵Esnan ku ta stima Bo lei tin gran pas, i nada no ta hasi nan trompeka.

¹⁶⁶Mi ta spera riba Bo salbashon, O SENOR, i ta kumpli ku Bo mandamentunan.

¹⁶⁷Mi alma ta warda Bo testimonionan, i mi ta stima nan masha hopi mes.

¹⁶⁸Mi ta warda Bo preseptonan i Bo testimonionan, pasobra tur mi kamindanan ta Bo dilanti.

¹⁶⁹Laga mi sklamashon yega Bo dilanti, O SENOR; dunami komprendementu segun Bo palabra.

¹⁷⁰Laga mi suplika yega Bo dilanti; librami segun Bo palabra.

¹⁷¹Laga mi lepnan ekspresa alabansa, pasobra Bo ta sinami Bo statutonan.

¹⁷²Laga mi lenga kanta di Bo palabra, pasobra tur Bo mandamentunan ta hustisia.

¹⁷³Laga Bo man ta kla pa yudami, pasobra mi a skohe pa Bo preseptonan.

¹⁷⁴Mi ta anhela na Bo salbashon, O SENOR, i Bo lei ta mi delisia.

¹⁷⁵Laga mi alma biba pa e por alabaBo, i laga Bo ordenansanan yudami.

¹⁷⁶Mi a kana dwal manera un karne perdi; buska Bo sirbido, pasobra mi no ta lubida Bo mandamentunan.