Read Papantla Totonac Salmonan 135 Bible Online

Salmonan 135 - Papantla Totonac bible

Salmonan 135

¹Alaba SENOR! Alaba e nomber di SENOR; alab'E, O sirbidonan di SENOR,

²ku ta sirbi den e kas di SENOR, riba e plenchinan di e kas di nos Dios!

³Alaba SENOR, pasobra SENOR ta bon; kanta alabansa na Su nomber, pasobra esaki ta agradabel.

⁴Pasobra SENOR a skohe Jakob pa Su mes, Israel komo Su tesoro pekuliar.

⁵Pasobra mi sa ku SENOR ta grandi, i ku nos Senor ta riba tur dios.

⁶Tur loke ta agrada SENOR, E ta hasi den shelu i riba tera, den e lamannan i den tur e profundidatnan.

⁷E ta hasi damp subi bai ariba for di e finnan di tera; E ta traha lamper pa awaseru; E ta hasi bientu sali for di Su luganan-di-warda-tesoro.

⁸El a mata e primogenitonan di Egipto, tantu di hende komo di bestia.

⁹El a manda senalnan i maraviyanan meimei di bo, O Egipto, riba Farao i tur su sirbidonan.

¹⁰El a derota hopi nashon, i a mata reinan poderoso:

¹¹Sehon, rei di e amoreonan, i Og, rei di Basan; i tur e reinonan di Kanaan;

¹²i nan tera El a duna komo un erensia, un erensia na Israel, Su pueblo.

¹³Bo nomber, O SENOR, ta eterno, O SENOR, durante di tur generashon lo Bo wordu rekorda.

¹⁴Pasobra SENOR lo huzga Su pueblo, i E lo tin kompashon ku Su sirbidonan.

¹⁵E idolonan di e nashonnan ta plata i oro, obra di mannan di hende.

¹⁶Nan tin boka, ma nan no ta papia; nan tin wowo, ma nan no ta mira;

¹⁷nan tin orea, ma nan no ta tende; tampoko no tin rosea den nan boka.

¹⁸Esnan ku ta traha nan lo ta meskos ku nan, i tur esnan ku ta konfia den nan.

¹⁹O kas di Israel, bendishona SENOR; O kas di Aaron, bendishona SENOR;

²⁰O kas di Levi, bendishona SENOR; boso ku ta teme SENOR, bendishona SENOR.

²¹Bendishona sea SENOR for di Sion, Kende ta biba na Jerusalem. Alaba SENOR!