Read Papantla Totonac Salmonan 139 Bible Online

Salmonan 139 - Papantla Totonac bible

Salmonan 139

¹O SENOR, Bo a saminami i Bo konosemi.

²Bo sa ki ora mi ta sinta i ki ora mi ta lanta; Bo ta komprende mi pensamentunan djaleu.

³Bo ta skudrina mi kanamentu i mi drumimentu, i tur mi kamindanan ta konosi pa Bo.

⁴Prome ku tin un palabra riba mi lenga, ya Bo konose esaki kaba, O SENOR.

⁵Bo a rondonami di patras i di padilanti, i a pone Bo man riba mi.

⁶E konosementu aki ta muchu maraviyoso pa mi; e ta muchu haltu, mi no por alkans'e.

⁷Na unda mi por bai for di Bo Spiritu? Of na unda mi por hui bai for di Bo presensia?

⁸Si mi subi na shelu, Bo ta einan; si mi habri mi kama den Seol, mira, einan tambe Bo ta!

⁹Si mi tuma hala di marduga, si mi bai biba den e partinan mas aleha di laman,

¹⁰ayanan tambe Bo man lo guiami, i Bo man drechi lo kohemi tene.

¹¹Si mi bisa: "Siguramente skuridat lo tapami, i e lus ku ta ront di mi lo bira nochi,"

¹²asta e skuridat no ta skur pa Bo, i anochi ta mes kla ku di dia. Skuridat i lus ta meskos pa Bo.

¹³Pasobra Bo a forma mi rinonnan; Bo a wef mi, formami den barika di mi mama.

¹⁴Mi ta alabaBo, pasobra mi ta traha na un manera temerosamente maraviyoso; maraviyoso ta Bo obranan, i mi alma sa esei masha bon.

¹⁵Mi wesunan no tabata skondi pa Bo, tempu ku mi a wordu traha na sekreto, bon forma den e profundidatnan di tera.

¹⁶Bo wowonan a mira mi supstansia sin forma; i e dianan ku tabata stipula pa mi, tur tabata skirbi den Bo buki, tempu ku no tabatin ningun di nan ainda.

¹⁷Ki presioso Bo pensamentunan ta pa mi, O Dios! Ki grandi nan kantidat ta!

¹⁸Si mi lo a konta nan, nan lo a surpasa e pipitanan di santu. Ora mi spierta, ainda mi ta serka Bo.

¹⁹O Dios, ku Bo lo a kita bida di e malbado; bai for di mi, boso, hombernan dramado di sanger!

²⁰Pasobra nan ta papia malu di Bo, i Bo enemigunan ta uza Bo nomber en bano.

²¹Lo mi no odia esnan ku ta odiaBo, O SENOR, i aborese esnan ku ta lanta kontra Bo?

²²Mi ta odia nan di henter mi kurason; mi tin nan pa mi enemigu.

²³Skudrinami, O Dios, i konose mi kurason; purbami i konose mi pensamentunan,

²⁴i mira si tin kualke kaminda di maldat den mi, i guiami riba e kaminda eterno.