Read Papantla Totonac Salmonan 145 Bible Online

Salmonan 145 - Papantla Totonac bible

Salmonan 145

¹Lo mi halsaBo, mi Dios, O Rei, i lo mi bendishona Bo nomber pa semper i semper.

²Tur dia lo mi bendishonaBo, i lo mi alaba Bo nomber pa semper i semper.

³SENOR ta grandi, i digno di ser alaba na gran manera; i Su grandesa ta inskudrinabel.

⁴Generashon pa generashon lo alaba Bo obranan, i lo deklara Bo echonan poderoso.

⁵Lo mi medita den e splendor glorioso di Bo mahestat, i den Bo obranan maraviyoso.

⁶Hende lo papia di e poder di Bo echonan temibel; i lo mi konta di Bo grandesa.

⁷Ku animo nan lo papia di e rekuerdo di Bo gran bondat, i lo kanta ku goso di Bo hustisia.

⁸SENOR ta yen di grasia i kompashon, Kende no ta rabia lihe, i ta grandi den miserikordia.

⁹SENOR ta bon pa tur, i Su miserikordianan ta riba tur Su obranan.

¹⁰Tur Bo obranan lo alabaBo, O SENOR, i Bo santunan lo bendishonaBo.

¹¹Nan lo papia di e gloria di Bo reino, i papia di Bo poder,

¹²pa hasi yunan di hende konose Bo echonan poderoso, i e mahestat glorioso di Bo reino.

¹³Bo reino ta un reino eterno, i Bo dominio ta di generashon pa generashon.

¹⁴SENOR ta sostene tur ku kai, i ta lanta tur ku ta abati.

¹⁵Wowo di tur hende ta spera riba Bo, i Bo ta duna nan nan kuminda na su debido tempu.

¹⁶Bo ta habri Bo man, i ta satisfase e deseo di tur ser bibu.

¹⁷SENOR ta hustu den tur Su kamindanan, i miserikordioso den tur Su obranan.

¹⁸SENOR ta serka di tur esnan ku ta sklama na djé, serka di tur esnan ku ta sklama na djé den berdat.

¹⁹E lo kumpli ku e deseo di esnan ku ta tem'E; tambe E lo tende nan sklamashon i lo salba nan.

²⁰SENOR ta warda tur ku ta stim'E, ma tur e malbadonan E lo destrui.

²¹Mi boka lo papia di e alabansa di SENOR; i tur karni lo bendishona Su nomber santu pa semper i semper.