Read Papantla Totonac Salmonan 18 Bible Online

Salmonan 18 - Papantla Totonac bible

Salmonan 18

¹"Mi ta stimaBo, O SENOR, mi fortalesa."

²SENOR ta mi baranka i mi forti, i mi libertador, mi Dios, mi baranka, den Kende mi ta tuma refugio, mi eskudo i e kachu di mi salbashon, mi toren haltu.

³Mi ta sklama na SENOR, Kende ta digno di ser alaba, i lo mi ta salba for di mi enemigunan.

⁴E kabuyanan di morto a enserami, i e torentenan di impiedat a terorisami.

⁵E kabuyanan di Seol a rondonami; e trampanan di morto a konfrontami.

⁶Den mi angustia mi a sklama na SENOR, si, mi a sklama na mi Dios; for di Su tempel El a tende mi bos i mi sklamashon pa yudansa a yega Su dilanti, te na Su orea.

⁷E ora ei tera a sakudi i a tembla; i e fundeshinan di e serunan tabata tembla i a wordu sakudi, pasobra E tabata rabia.

⁸Huma tabata sali for di Su nanishi bai ariba, i kandela for di Su boka tabata devora; karbon a wordu send! dor di esaki.

⁹Tambe El a inklina e shelunan i a baha bin ku skuridat profundo bou di Su pianan.

¹⁰I El a kabalga riba un kerubin i a bula; si, El a bula riba e halanan di bientu.

¹¹El a hasi skuridat Su luga di skonde, su kapa ront di djé, skuridat di awanan, nubianan skur di shelu.

¹²For di e splendor Su dilanti Su nubianan skur tabata pasa, hagel i karbon sendi.

¹³Tambe SENOR a strena den e shelunan, i e Haltisimo a hasi Su bos resona, hagel i karbon sendi.

¹⁴El a tira Su flechanan i a plama nan; el a lansa lamper ku tabata korta pisa i a konfundi nan.

¹⁵E ora ei e vayenan di laman a parese, i e fundeshinan di mundu a keda bisto, dor di Bo reprendementu, O SENOR, debi na e suplamentu pisa di e rosea di Bo nanishi.

¹⁶El a saka Su man for di ariba, El a garami; El a sakami for di hopi awanan.

¹⁷El a librami di mi enemigu poderoso, i di esnan ku tabata odiami, pasobra nan tabata muchu fuerte pa mi.

¹⁸Nan a konfrontami den e dia di mi kalamidat, ma SENOR tabata mi sosten.

¹⁹Tambe El a sakami hibami na un luga espasioso; El a reskatami, pasobra E tabatin delisia den mi.

²⁰SENOR a rekompensami segun mi hustisia; segun e limpiesa di mi mannan El a rekompensami.

²¹Pasobra mi a warda e kamindanan di SENOR, i mi no a peka bandona mi Dios.

²²Pasobra tur Su ordenansanan tabata mi dilanti, i mi no a aparta mi mes for di Su statutonan.

²³Tambe mi tabata perfekto Su dilanti, i mi a warda mi mes for di mi inikidat.

²⁴Pesei SENOR a rekompensami segun mi hustisia, segun e limpiesa di mi mannan dilanti di Su bista.

²⁵Na e hende miserikordioso Bo ta mustra Bo mes miserikordioso; na e hende rekto Bo ta mustra Bo mes rekto;

²⁶na e hende puru Bo ta mustra Bo mes puru, ma na e hende perverso Bo ta mustra Bo mes severo.

²⁷Pasobra Bo ta salba un pueblo afligi, ma Bo ta rebaha wowonan arogante.

²⁸Pasobra Bo ta sende mi lampi; SENOR mi Dios ta ilumina mi skuridat.

²⁹Pasobra ku Bo mi por kaba ku un ehersito; i ku mi Dios mi por bula ofer di un muraya.

³⁰Pa loke ta Dios, Su kaminda ta perfekto; e Palabra di SENOR ta proba; E ta un eskudo pa tur esnan ku ta tuma refugio den djé.

³¹Pasobra ta ken ta Dios, si no ta SENOR? I ta ken ta un baranka si no ta nos Dios,

³²e Dios ku ta fahami ku forsa, i ku ta hasi mi kamindanan perfekto?

³³E ta hasi mi pianan manera pia di bina, i ta ponemi para riba mi luganan haltu.

³⁴E ta tren mi mannan pa bataya, asina ku mi brasanan por dobla un bog di brons.

³⁵Tambe Bo a dunami e eskudo di Bo salbashon, i Bo man drechi ta sostenemi, i Bo gentilesa ta hasimi grandi.

³⁶Bo ta hancha e kaminda bou di mi, i mi pianan no ta slep.

³⁷Mi a persigui mi enemigunan i a alkansa nan, i mi no a hal'atras te ora nan a wordu destrui.

³⁸Mi a kibra nan na pida-pida, asina ku nan no por a lanta mas; nan a kai bou di mi pianan.

³⁹Pasobra Bo a fahami ku forsa pa bataya; Bo a hasi esnan ku a lanta kontra mi somete nan mes na mi.

⁴⁰Tambe Bo a hasi mi enemigunan bira lomba pa mi, i mi a destrui esnan ku tabata odiami.

⁴¹Nan a sklama pa yudansa, ma no tabatin ningun hende pa salba; nan a sklama na SENOR, ma E no a kontesta nan.

⁴²E ora ei mi a bati nan hasi nan fini-fini manera stof dilanti di bientu; mi a tira nan afo manera lodo di kaya.

⁴³Bo a librami di e pleitunan di e pueblo; Bo a ponemi komo kabesante di e nashonnan; un pueblo ku nunka mi a konose ta sirbimi.

⁴⁴Asina ku nan tendemi, nan ta obedesemi; stranheronan ta somete nan mes na mi.

⁴⁵Stranheronan ta desmaya, i ta sali na temblamentu for di nan fortinan.

⁴⁶SENOR ta biba, i bendishona sea mi baranka; i halsa sea e Dios di mi salbashon,

⁴⁷e Dios ku ta ehekuta vengansa pa mi, i ta hasi pueblonan somete nan mes na mi.

⁴⁸E ta librami di mi enemigunan; si, Bo ta halsami ariba di esnan ku ta lanta kontra mi; Bo ta reskatami for di e hende violento.

⁴⁹Pesei lo mi dunaBo gradisimentu, O SENOR, meimei di e nashonnan, i lo mi kanta alabansa na Bo nomber.

⁵⁰E ta duna gran liberashon na Su rei, i ta mustra miserikordia na Su ungi, na David i su desendientenan pa semper.