Read Papantla Totonac Salmonan 22 Bible Online

Salmonan 22 - Papantla Totonac bible

Salmonan 22

¹Mi Dios, mi Dios, pakiko Bo a bandonaMi? Pakiko Bo ta asina leu di yudami, asina leu di e palabranan di mi sklamashon?

²O mi Dios, di dia mi ta sklama, ma Bo no ta kontesta; i anochi, ma no tin sosiegu pa mi.

³Ma Abo ta santu, Abo ku ta sinta riba trono di e alabansanan di Israel.

⁴Den Bo nos tatanan a konfia; nan a konfia i Bo a libra nan.

⁵Na Bo nan a sklama, i nan a wordu libra; den Bo nan a konfia, i nan no a keda brongosa.

⁶Ma ami ta un bichi, i no un hende, un reproche pa hende, i despresia pa e pueblo.

⁷Tur esnan ku mirami ta hasi bofon di mi; nan ta trek boka, nan ta sakudi kabes, bisando:

⁸"El a konfia den SENOR; lagu'E libr'e; lagu'E reskat'e, pasobra E tin delisia den dje."

⁹Ma Abo ta Esun ku a sakami for di barika di mi mama; Bo a hasimi konfia tempu ku mi tabata na pechu di mi mama.

¹⁰For di mi nasementu mi a wordu entrega na Bo; for di den barika di mi mama Bo tabata mi Dios.

¹¹No sea leu di mi, pasobra angustia ta serka; pasobra no tin ningun hende pa yuda.

¹²Hopi toro a rondonami; toronan fuerte di Basan ta tur ront di mi.

¹³Nan ta span nan boka hanchu kontra mi, manera leon ku ta gruna i habraka.

¹⁴Mi ta wordu basha afo manera awa, i tur mi wesunan a sali for di luga; mi kurason ta manera was; el a dirti den mi paden.

¹⁵Mi forsa a seka manera un skerf di pochi-di-klei, i mi lenga ta pega na mi shel'i boka; i Bo ta ponemi drumi den stof di morto.

¹⁶Pasobra kachonan a rondonami; un trupa di hasidonan di maldat ta tur ront di mi; nan a traspasa mi mannan i mi pianan.

¹⁷Mi por konta tur mi wesunan; nan ta wak, i ta keda wak mi.

¹⁸Nan ta parti mi pananan entre nan, i nan ta tira lot riba mi bisti.

¹⁹Ma Abo, O SENOR, no sea leu di mi; Abo, mi yudansa, pura bin na mi ayudo.

²⁰Libra mi alma for di spada, mi uniko bida, for di e poder di kacho.

²¹Salbami for di boka di leon; i for di e kachunan di buey di mondi Bo ta kontestami.

²²Lo mi anunsia Bo nomber na mi rumannan; meimei di e asamblea lo mi alabaBo.

²³Boso ku ta teme SENOR, alab'E; boso tur ku ta desendientenan di Jakob, glorifik'E; boso tur ku ta desendientenan di Israel, para Su dilanti ku temor.

²⁴Pasobra E no a despresia, ni a aborese e aflikshon di esun ku ta afligi; tampoko E no a skonde Su kara p'e; ma ora ku el a sklama na djé pa yudansa, El a tende.

²⁵For di Bo mi alabansa ta bin den e gran asamblea; lo mi kumpli ku mi promesa den presensia di esnan ku tin temor di djé.

²⁶Esnan ku ta afligi lo kome i keda satisfecho; esnan ku ta buska SENOR lo alab'E. Laga boso kurason biba pa semper.

²⁷Tur e finnan di mundu lo korda i bolbe serka SENOR, i tur e famianan di e nashonnan lo adora Bo dilanti.

²⁸Pasobra e reino ta di SENOR, i E ta goberna riba e nashonnan.

²⁹Tur esnan di mundu ku ta prospera lo kome i adora; tur esnan ku ta bolbe na stof lo buig Su dilanti, esnan ku no por tene nan alma na bida.

³⁰Nan desendensia lo sirbié; esaki lo wordu konta tokante di Senor na e generashon benidero.

³¹Nan lo bin i deklara Su hustisia na un pueblo ku mester nase ainda, ku El a hasi tur esaki.