Read Papantla Totonac Salmonan 25 Bible Online

Salmonan 25 - Papantla Totonac bible

Salmonan 25

¹Na Bo, O SENOR, mi ta halsa mi alma.

²O mi Dios, den Bo mi ta konfia. No lagami keda brongosa; no laga mi enemigunan triunfa riba mi.

³Di berdat, ningun di esnan ku ta spera riba Bo lo keda brongosa; esnan ku ta transgresa sin motibu lo keda brongosa.

⁴Hasimi konose Bo kamindanan, O SENOR; sinami Bo berehanan.

⁵Guiami den Bo berdat i sinami, pasobra ta Abo ta e Dios di mi salbashon; riba Bo mi ta spera henter dia.

⁶Korda, O SENOR, Bo kompashon i Bo miserikordianan, pasobra nan ta for di eternidat.

⁷No korda e pikanan di mi hubentut, ni mi transgreshonnan; konforme Bo miserikordia, korda riba mi, pa motibu di Bo bondat, O SENOR.

⁸SENOR ta bon i rekto; pesei E ta instrui pekadonan den e kaminda.

⁹E ta guia e umildenan den huisio, i E ta sina e umildenan Su kaminda.

¹⁰Tur e berehanan di SENOR ta miserikordia i berdat pa esnan ku ta warda Su aliansa i Su testimonionan.

¹¹Pa motibu di Bo nomber, O SENOR, pordona mi inikidat, pasobra esei ta grandi.

¹²Ta ken ta e hende ku ta teme SENOR? E lo instruie den e kaminda ku e mester skohe.

¹³Su alma lo biba den prosperidat, i su desendientenan lo ereda e tera.

¹⁴E komunion intimo di SENOR ta ku esnan ku ta tem'E, i E lo hasi nan konose Su aliansa.

¹⁵Mi wowonan ta kontinuamente riba SENOR, pasobra E lo saka mi pianan for di reda.

¹⁶Bira wak mi i tene miserikordia di mi, pasobra mi ta solitario i afligi.

¹⁷E angustianan di mi kurason ta oumenta; sakami for di mi anshanan.

¹⁸Mira mi aflikshon i mi dolo, i pordona tur mi pikanan.

¹⁹Mira mi enemigunan, pasobra nan ta hopi; i nan ta odiami ku odio violento.

²⁰Warda mi alma i librami; no lagami keda brongosa, pasobra mi ta tuma refugio den Bo.

²¹Laga integridat i rektitut wardami, pasobra mi ta spera riba Bo.

²²Redimi Israel, O Dios, for di tur su angustianan.