Read Papantla Totonac Salmonan 27 Bible Online

Salmonan 27 - Papantla Totonac bible

Salmonan 27

¹SENOR ta mi lus i mi salbashon; di ken lo mi tin temor? SENOR ta e fortalesa di mi bida; di ken lo mi tin miedu?

²Ora hasidonan di maldat, mi atversarionan i mi enemigunan, a bin riba mi pa devora mi karni, nan a trompeka i a kai.

³Maske un ehersito kampa kontra mi, mi kurason lo no tin temor; maske guera lanta kontra mi, tog lo mi tin konfiansa.

⁴Un kos mi a desea di SENOR, esei lo mi buska: ku mi por keda den e kas di SENOR tur e dianan di mi bida, pa kontempla e bunitesa di SENOR, i pa medita den Su tempel.

⁵Pasobra den e dia di angustia E lo skondemi den Su tabernakel; den e luga sekreto di Su tent E lo skondemi; E lo hisami pone riba un baranka.

⁶I awor mi kabes lo wordu halsa riba mi enemigunan ku ta tur ront di mi; i den Su tent lo mi ofrese sakrifisionan ku gritunan di alegria; lo mi kanta, si, lo mi kanta alabansa na SENOR.

⁷Tende mi bos, O SENOR, ora mi sklama; tene miserikordia di mi i kontestami.

⁸Ora Bo a bisami: "Buska Mi kara," mi kurason a kontestaBo: "Bo kara, O SENOR, lo mi buska."

⁹No skonde Bo kara pa mi, no rechasa Bo sirbido den Bo rabia; Bo tabata mi yudansa; no lagami, ni bandonami, O Dios di mi salbashon!

¹⁰Maske mi tata i mi mama bandonami, SENOR lo rekohemi.

¹¹Sinami Bo kaminda, O SENOR, i guiami den un bereha di rektitut, pa motibu di mi enemigunan.

¹²No entregami na deseo di mi atversarionan, pasobra testigunan falsu a lanta kontra mi, i esnan ku ta respira violensia.

¹³Lo mi a desespera, si mi no a kere ku lo mi mira e bondat di SENOR na e tera di e bibunan.

¹⁴Spera riba SENOR; sea fuerte i E lo fortalese bo kurason, si, spera riba SENOR.