Read Papantla Totonac Salmonan 30 Bible Online

Salmonan 30 - Papantla Totonac bible

Salmonan 30

¹Lo mi glorifikaBo, O SENOR, pasobra Bo a halsami, i no a laga mi enemigunan kontenta nan mes pa mi motibu.

²O SENOR, mi Dios, mi a sklama na Bo pa yudansa, i Bo a kurami.

³O SENOR, Bo a saka mi alma for di Seol; Bo a tenemi na bida, pa mi no tin mester di baha den pos.

⁴Kanta alabansa na SENOR, boso Su santunan, i duna gradisimentu na Su nomber santu.

⁵Pasobra Su rabia ta pa un momento so, Su fabor ta pa bida largu; yoramentu por dura un anochi, ma un gritu di alegria ta bin ora dia ta habri.

⁶Awor den mi prosperidat mi a bisa: "Lo mi no wordu movi nunka."

⁷O SENOR, pa medio di Bo fabor Bo a hasi mi seru para firme; Bo a skonde Bo kara; mi a keda tur desmaya.

⁸Na Bo, O SENOR, mi a sklama, i na SENOR mi a hasi suplika:

⁹"Ta ki probecho tin den mi sanger, si mi baha den pos? Stof lo alabaBo? E lo deklara Bo fieldat?

¹⁰Tende, O SENOR, i tene miserikordia di mi, O SENOR, sea Abo mi yudado."

¹¹Bo a kambia mi lamento na baliamentu; Bo a los mi pana-di-saku i a fahami ku alegria,

¹²pa mi alma kanta alabansa na Bo i no keda ketu. O SENOR mi Dios, lo mi dunaBo gradisimentu pa semper.