Read Papantla Totonac Salmonan 31 Bible Online

Salmonan 31 - Papantla Totonac bible

Salmonan 31

¹Den Bo, O SENOR, mi a tuma refugio; no lagami nunka keda brongosa; librami den Bo hustisia.

²Inklina Bo orea na mi, reskatami lihe; sea Abo un baranka di refugio pa mi, un fortalesa pa salbami.

³Pasobra Bo ta mi baranka i mi forti; pa kousa di Bo nomber lo Bo dirigimi i guiami.

⁴Abo lo sakami for di e reda ku nan a pone na skondi pa mi; pasobra ta Abo ta mi fortalesa.

⁵Den Bo man mi ta enkomenda mi spiritu; Bo a redimimi, O SENOR, Dios di fieldat.

⁶Mi ta aborese esnan ku ta venera idolo bano, ma mi ta konfia den SENOR.

⁷Lo mi regosiha i keda kontentu den Bo miserikordia, pasobra Bo a mira mi aflikshon; Bo tabata sa di e angustianan di mi alma,

⁸i Bo no a entregami den man di e enemigu; Bo a pone mi pianan den un luga espasioso.

⁹Tene miserikordia di mi, O SENOR, pasobra mi ta den angustia; mi wowo a gasta di pena, mi alma i mi kurpa tambe.

¹⁰Pasobra mi ta pasa mi bida den tristesa i mi ananan na kehamentu; mi forsa ta faya pa motibu di mi inikidat, i mi kurpa a para kaba na nada.

¹¹Pa motibu di tur mi atversarionan mi a bira un reproche, spesialmente pa mi bisinanan, i un opheto di horor pa mi konosinan; esnan ku mirami riba kaya ta hui pa mi.

¹²Mi a wordu lubida, manera un morto ku hende no ta korda riba dje mas; mi ta manera un butishi kibra.

¹³Pasobra mi a tende e kalumnia di hopi hende; na tur banda tin teror; mientras ku nan tabata konsulta huntu kontra mi, nan a traha plan pa kita mi bida.

¹⁴Ma pa loke t'ami, mi ta konfia den Bo, O SENOR; mi ta bisa: "Bo ta mi Dios."

¹⁵Mi tempunan ta den Bo man; librami for di man di mi enemigunan, i for di esnan ku ta persiguimi.

¹⁶Laga Bo kara resplandese riba Bo sirbido; salbami den Bo miserikordia.

¹⁷No lagami keda brongosa, O SENOR, pasobra mi ta sklama na Bo; laga e malbadonan keda brongosa, laga nan keda ketu den Seol.

¹⁸Laga e lepnan mentiroso bira mudo, e lepnan ku ta papia ku arogansia kontra e hustunan, ku orguyo i ku menospresio.

¹⁹Ki grandi ta Bo bondat, ku Bo a warda pa esnan ku tin temor di Bo, ku Bo a prepara pa esnan ku ta tuma refugio den Bo den presensia di e yunan di hende!

²⁰Bo ta skonde nan den e luga sekreto di Bo presensia pa e konspirashonnan di hende; Bo ta warda nan na sekreto den un luga di refugio pa e lenganan pleitista.

²¹Bendishona sea SENOR, pasobra El a mustrami Su miserikordia maraviyoso den un stat rondona.

²²Ma ami a bisa den mi desesperashon: "Mi ta korta kita for di Bo bista"; sinembargo, Bo a tende e bos di mi suplikanan ora mi a sklama na Bo.

²³Stima SENOR, boso tur, Su santunan! SENOR ta preserva e fielnan; i esun ku ta aktua ku orguyo E ta paga abundantemente.

²⁴Sea fuerte i fortalese boso kurason, boso tur ku ta spera den SENOR.