Read Papantla Totonac Salmonan 35 Bible Online

Salmonan 35 - Papantla Totonac bible

Salmonan 35

¹Defendemi, O SENOR, kontra esnan ku ta pleita ku mi; bringa ku esnan ku ta bringa ku mi.

²Kohe eskudo grandi i chikitu, i lanta pa yudami.

³Saka tambe lansa i hacha di guera kontra esnan ku ta persiguimi; bisa mi alma: "Ami ta bo salbashon."

⁴Laga esnan ku ta buska mi alma keda brongosa i desonra; laga esnan ku ta plania maldat kontra mi hal'atras i keda umiya.

⁵Laga nan ta manera bagas dilanti di bientu, i laga e Angel di SENOR kore ku nan.

⁶Laga nan kaminda ta skur i lebelebe, i laga e Angel di SENOR persigui nan.

⁷Pasobra sin motibu nan a skonde nan reda pa mi; sin motibu nan a koba un buraku pa mi alma.

⁸Laga destrukshon bin riba dje sin ku e ripara; laga e reda ku el a skonde, kohe e mes; i lagu'e kai den e mesun destrukshon ei.

⁹I mi alma lo alegra den SENOR, i lo regosiha den Su salbashon.

¹⁰Tur mi wesunan lo bisa: "SENOR, ken ta manera Bo, Kende ta libra esun afligi for di esun ku ta mas fuerte kune, i esun afligi i esun den nesesidat for di esun ku ta plunder e?"

¹¹Testigunan malisioso ta lanta; nan ta puntrami tokante di kosnan ku mi no sa.

¹²Nan ta pagami malu pa bon, i ta laga mi alma tristu.

¹³Ma pa loke t'ami, tempu ku nan tabata malu, mi bisti tabata pana-di-saku; mi a umiya mi alma ku yunamentu; i mi orashon a bolbe bek na mi mes kurason.

¹⁴Mi a komportami komo un amigu, komo un ruman; mi a buig te na suela, bisti tur na pretu, manera un hende ku ta na rou pa su mama.

¹⁵Ma ora mi a trompeka nan a regosiha i a reuni huntu; e atversarionan ku mi no tabata konose a sera kabes kontra mi; nan a kalumniami sin fin.

¹⁶Manera bofonadonan profano na un fiesta, nan a sera djente kontra mi.

¹⁷Senor, kuantu tempu mas lo Bo para mira? Reskata mi alma for di nan destrukshonnan, mi uniko bida for di leonnan.

¹⁸Lo mi dunaBo gradisimentu den e kongregashon grandi; lo mi alabaBo meimei di un multitut enorme.

¹⁹No laga esnan ku sin motibu ta mi enemigu, harimi; ni laga esnan ku sin motibu ta odiami, wak mi ku mal wowo.

²⁰Pasobra nan no ta papia di pas, ma kontra esnan ku ta biba trankil na e tera nan ta inventa palabranan enganoso.

²¹I nan a habri asina un boka grandi kontra mi; nan a bisa: "Aha, aha, nos mes wowo a mira esei!"

²²Bo a mira esei, O SENOR, no keda ketu; O Senor, no keda leu for di mi.

²³Spierta i lanta na mi defensa, defende mi kaso, mi Dios i mi Senor.

²⁴Huzgami, O SENOR mi Dios, segun Bo hustisia; i no laga nan harimi.

²⁵No laga nan bisa den nan kurason: "Aha! Nos deseo!" No laga nan bisa: "Nos a tragu'e!"

²⁶Laga esnan ku ta gosa di mira mi angustia keda brongosa i konhuntamente umiya; laga esnan ku ta halsa nan mes riba mi keda bisti ku berguensa i desonor.

²⁷Laga esnan ku ta kontentu ku mi kaso hustu grita di alegria i regosiha; laga nan bisa kontinuamente: "SENOR sea engrandesi, esun ku tin delisia den e prosperidat di Su sirbido."

²⁸I mi lenga lo deklara Bo hustisia, i Bo alabansa henter dia.