Read Papantla Totonac Salmonan 37 Bible Online

Salmonan 37 - Papantla Totonac bible

Salmonan 37

¹No kunsumi pa motibu di malbadonan, ni sea envidioso di e hasidonan di inikidat.

²Pasobra pronto nan lo wordu korta manera yerba, i nan lo marchita manera yerba berde.

³Konfia den SENOR i hasi loke ta bon; biba den e tera i alimenta bo mes ku Su fieldat.

⁴Deleita bo mes den SENOR, i E lo dunabo e deseonan di bo kurason.

⁵Enkomenda bo kaminda na SENOR, konfia tambe den djé, i E lo hasie.

⁶I E lo laga bo hustisia briya manera lus, i bo derecho manera merdia.

⁷Sosega den SENOR, i warda ku pasenshi riba djé; no kunsumi pa motibu di esun ku ta prospera den su kaminda, pa motibu di e hende ku ta ehekuta plan di maldat.

⁸Stop di rabia i laga furia para; no kunsumi--esei ta kondusi na maldat so.

⁹Pasobra hasidonan di maldat lo wordu korta kita afo; ma esnan ku spera riba SENOR lo ereda e tera.

¹⁰Pasobra aki poko tempu e malbado lo no t'ei mas; maske kuantu bo buska su luga, e lo no t'ei.

¹¹Ma e umildenan lo ereda e tera, i lo deleita nan mes den pas abundante.

¹²E malbado ta traha komplot kontra e hustu, i ta sera djente kontra dje.

¹³Senor ta harie, pasobra E ta mira ku su dia ta yegando.

¹⁴E malbadonan a saka spada i a span nan bog, pa tira e afliginan abou, i esnan den nesesidat, pa mata esnan ku ta kana den rektitut.

¹⁵Nan spada lo drenta nan mes kurason, i nan bognan lo wordu kibra.

¹⁶E poko ku e hustu tin ta miho ku e abundansia di hopi malbado.

¹⁷Pasobra brasa di e malbado lo wordu kibra, ma SENOR ta sostene e hustu.

¹⁸SENOR konose e dianan di e perfektonan; i nan erensia lo keda pa semper.

¹⁹Nan lo no keda brongosa den tempu malu; i den dianan di hamber nan lo tin abundansia.

²⁰Ma e malbado lo perese, i e enemigunan di SENOR lo ta manera flor di sabana: nan ta disparse--manera huma nan ta disparse.

²¹E malbado ta fia i no ta paga bek, ma e hustu tin miserikordia i ta duna.

²²Pasobra esnan ku E bendishona lo ereda e tera; ma esnan ku E maldishona lo wordu korta kita afo.

²³E pasonan di un hende ta stablesi dor di SENOR, i E tin delisia den su kaminda.

²⁴Maske e trompeka, e lo no kai; pasobra SENOR ta sosten'e ku Su man.

²⁵Mi tabata yon, i awor mi ta bieu; ma nunka mi no a mira e hustu desampara, ni su desendientenan ta pidi pan.

²⁶Semper e ta miserikordioso i ta fia; i su desendientenan lo ta bendishona.

²⁷Aparta bo mes for di maldat i hasi loke ta bon; asina lo bo biba pa semper.

²⁸Pasobra SENOR ta stima hustisia i no ta bandona Su santunan. Nan ta keda preserva pa semper; ma e desendientenan di e malbado lo wordu korta kita afo.

²⁹E hustunan lo ereda e tera, i lo biba den dje pa semper.

³⁰For di boka di e hustu ta sali sabiduria, i su lenga ta papia hustisia.

³¹E lei di su Dios ta den su kurason; su pianan no ta slep.

³²E malbado ta spiona e hustu, i ta busk'e pa mata.

³³SENOR no ta lagu'e den su man, ni ta lagu'e keda kondena ora ku e wordu huzga.

³⁴Spera riba SENOR i sigui Su kaminda, i E lo halsabo pa ereda e tera; ora ku e malbadonan wordu korta kita afo, abo lo mira esaki.

³⁵Mi a mira un homber violento i malbado, ku a ekstende su mes manera un palu nativo, berde bunita.

³⁶Anto el a muri, i ata, e no tabat'ei mas; mi a busk'e, ma e no por a wordu hana.

³⁷Tuma nota di e hende perfekto, i opserva esun ku ta rekto; pasobra e hende di pas lo tin desendiente.

³⁸Ma transgresornan konhuntamente lo wordu destrui; e desendientenan di e malbado lo wordu korta kita afo.

³⁹Ma salbashon di e hustunan ta bin for di SENOR; E ta nan fortalesa den tempu di angustia.

⁴⁰I SENOR ta yuda nan i ta libra nan; E ta libra nan for di e malbadonan i ta salba nan, pasobra nan ta tuma refugio den djé.