Read Papantla Totonac Salmonan 39 Bible Online

Salmonan 39 - Papantla Totonac bible

Salmonan 39

¹Mi a bisa: "Lo mi warda mi kamindanan, pa mi no hasi pika ku mi lenga; lo mi warda mi boka ku un bosal, tanten ku e malbadonan ta den mi presensia."

²Mi a keda stom i sin abla, mi a keda sin papia asta loke ta bon; i mi dolo a bira pio.

³Mi kurason tabata kima den mi; mientras mi tabata sinta pensa e kandela tabata kima; e ora ei mi a papia ku mi lenga:

⁴"SENOR, lagami sa mi fin i kuantu mi dianan ta; lagami sa kon pasahero mi ta.

⁵Ata, Bo a hasi mi dianan manera un span di man, i mi edat ta manera nada den Bo bista; siguramente kada hende den su miho kondishon ta djis un rosea.

⁶Di berdat, tur hende ta kana ront manera un sombra; si, nan ta hasi lawai pornada; e ta montona rikesanan i no sa ken lo rekohe nan.

⁷"I awor, Senor, riba kiko mi ta spera? Mi speransa ta den Bo.

⁸Librami for di tur mi transgreshonnan; no hasimi bira reproche di hende bobo.

⁹Mi a bira mudo, mi no ta habri mi boka, pasobra ta Abo a hasi esaki.

¹⁰Kita Bo plaga for di mi; pa motibu di e preshon di Bo man mi ta perese.

¹¹Ora Bo koregi un hende ku kastigu pa su inikidat, Bo ta kaba ku loke ta presioso p'e, meskos ku mot ta hasi; siguramente hende ta djis un rosea.

¹²"Tende mi orashon, O SENOR, i skucha mi sklamashon; no keda ketu pa mi lagrimanan; pasobra mi ta un deskonosi serka Bo, un stranhero, manera tur mi antepasadonan.

¹³Kita Bo bista for di mi, pa mi por ta kontentu atrobe, prome ku mi bai i mi no t'ei mas."