Read Papantla Totonac Salmonan 40 Bible Online

Salmonan 40 - Papantla Totonac bible

Salmonan 40

¹Mi a spera ku pasenshi riba SENOR; i El a inklina Su mes na mi i a skucha mi sklamashon.

²El a sakami for di e pos di destrukshon, for di e lodo di klei; i El a pone mi pia riba un baranka i a hasi mi pasonan firme.

³I El a pone un kantika nobo den mi boka, un kantika di alabansa na nos Dios; hopi lo mira esaki i teme, i lo konfia den SENOR.

⁴Bendishona ta e hende ku ta pone su konfiansa den SENOR, i ku no ta mira riba e orguyosonan, ni riba esnan ku ta desvia bai tras di mentira.

⁵O SENOR mi Dios, hopi ta e maraviyanan ku Bo a hasi, i Bo pensamentunan pa ku nos; no tin ningun ku ta di kompara ku Bo; si mi lo kier a konta i papia di nan, nan lo tabata muchu hopi pa konta.

⁶Sakrifisio i ofrenda di mainshi Bo no a desea; Bo a habri mi oreanan; ofrenda kima i ofrenda pa pika Bo no a eksigi.

⁷E ora ei mi a bisa: "Ata, mi ta bin; den e rol di e buki ta para skirbi tokante di mi;

⁸Pa hasi Bo boluntat, O mi Dios, ta un delisia pa mi; Bo Lei ta den mi kurason."

⁹Mi a proklama bon nobo di hustisia den e kongregashon grandi; ata, lo mi no frena mi lepnan, O SENOR, Bo sa esei.

¹⁰Mi no a skonde Bo hustisia den mi kurason; mi a papia di Bo fieldat i di Bo salbashon; mi no a skonde Bo miserikordia i Bo berdat pa e kongregashon grandi.

¹¹Abo, O SENOR, lo no keda sin dunami Bo kompashon; Bo miserikordia i Bo berdat lo wardami kontinuamente.

¹²Pasobra masha hopi maldat mes a rondonami; mi inikidatnan a alkansami, asina ku mi no por a mira; nan ta mas hopi ku e kabeinan riba mi kabes; i mi kurason a fayami.

¹³Sea asina bon, O SENOR, di librami; O SENOR, pura pa yudami.

¹⁴Laga esnan ku ta buska mi alma pa destrui keda brongosa i konhuntamente umiya; laga esnan ku ta desea malu pa mi wordu hala patras i keda desonra.

¹⁵Laga esnan ku ta bisami: "Aha, aha!" keda desola pa motibu di nan berguensa.

¹⁶Laga tur esnan ku ta buskaBo regosiha i keda kontentu den Bo; laga esnan ku ta stima Bo salbashon bisa kontinuamente: "SENOR sea engrandesi!"

¹⁷Ma ami ta afligi i den nesesidat; sinembargo, Senor ta korda riba mi. Bo ta Esun ku ta yudami i ta librami; no tarda, O mi Dios.