Read Papantla Totonac Salmonan 49 Bible Online

Salmonan 49 - Papantla Totonac bible

Salmonan 49

¹Tende esaki, tur pueblo; skucha, tur habitante di mundu,

²tantu hende umilde komo hende di posishon haltu, riku i pober tur huntu.

³Mi boka lo papia sabiduria; i e meditashon di mi kurason lo ta komprendementu.

⁴Lo mi inklina mi orea na un proverbio; lo mi hasi mi charada konosi riba arpa.

⁵Pakiko lo mi tin miedu den e dianan di atversidat, ora ku e inikidat di mi opresornan ta rondonami,

⁶esnan ku ta konfia den nan rikesa, i ta gaba di e abundansia di nan biennan?

⁷Di ningun manera un hende por redimi su ruman, ni paga Dios plaka di reskate p'e--

⁸pasobra e redenshon di su alma ta kostoso; e lo no por paga p'e nunka--

⁹pa e por a sigui biba pa semper i no mira korupshon.

¹⁰Pasobra e ta mira ku asta hende sabi ta muri; e bobo i esnan sin sinti ta perese na e mesun manera, i ta laga nan rikesa pa otronan.

¹¹Nan pensamentu intimo ta ku nan kasnan t'ei pa semper, nan luganan di biba pa tur generashon; nan a duna nan terenonan nan mes nomber.

¹²Ma hende ku tur su onor no ta permanese; e ta meskos ku bestia ku ta perese.

¹³T'asina ta bai ku e bobonan, i ku nan desendientenan ku ta aproba nan palabranan.

¹⁴Manera karne nan ta destina pa Seol; morto lo ta nan wardado; i e rektonan lo goberna riba nan den mainta; Seol lo kaba ku nan aparensia bunita, asina ku nan no tin habitashon.

¹⁵Ma Dios lo redimi mi alma for di e poder di Seol, pasobra E lo tumami serka djé.

¹⁶No tene miedu ora ku un hende bira riku, ora ku e gloria di su kas oumenta;

¹⁷pasobra ora ku e muri, e lo no bai ku nada; su gloria lo no baha su tras.

¹⁸Maske e ta bendishona su alma mientras ku e ta na bida, i maske hende gababo ora bo ta hasi bon na bo mes,

¹⁹e lo bai serka e generashon di su tatanan; nunka nan lo no mira e lus.

²⁰Hende ku tur su onor, i tog sin komprendementu, ta meskos ku bestia ku ta perese.