Read Papantla Totonac Salmonan 69 Bible Online

Salmonan 69 - Papantla Totonac bible

Salmonan 69

¹Salbami, O Dios, pasobra e awanan a yega te na mi alma.

²Mi a senk den lodo hundu, kaminda no tin luga pa para; mi a kai den awanan hundu, i un diluvio ta pasa ofer di mi.

³Mi ta kansa di sklama; mi garganta a keda tur seku; mi wowonan ta faya mientras ku mi ta spera riba mi Dios.

⁴Esnan ku ta odiami sin motibu ta mas ku e kabeinan riba mi kabes; esnan ku kier a destruimi ta poderoso; loke mi no a horta, mi mester debolbe tog.

⁵O Dios, Abo ta Esun ku sa di mi lokura, i mi erornan no ta skondi pa Bo.

⁶O Senor DIOS di ehersitonan, no laga esnan ku ta spera riba Bo keda brongosa pa mi motibu; O Dios di Israel, no laga esnan ku ta buskaBo keda konfundi pa mi motibu.

⁷Pasobra pa Bo motibu mi a sufri reproche; berguensa a tapa mi kara.

⁸Mi a bira un stranhero pa mi ruman hombernan, i un deskonosi pa e yunan di mi mama.

⁹Pasobra zelo pa Bo kas a kaba ku mi, i e reprochenan di esnan ku ta reprochaBo a kai riba mi.

¹⁰Ora mi a yora i a umiya mi alma ku yunamentu, esei a bira mi reproche.

¹¹Ora mi a tapa mi kurpa ku pana-di-saku, mi a bira un proverbio pa nan.

¹²Esnan ku ta sinta den porta di stat ta papia riba mi, i mi ta e kantika di burachenan.

¹³Ma pa loke t'ami, mi orashon ta na Bo, O SENOR, na un tempu aseptabel; O Dios, den e grandesa di Bo miserikordia, kontestami den e berdat di Bo salbashon.

¹⁴Librami for di lodo, i no lagami senk; lagami wordu libra for di mi enemigunan, i for di awanan hundu.

¹⁵No laga diluvio di awa pasa ofer di mi, ni abismo tragami; i no laga e pos sera su boka riba mi.

¹⁶Kontestami, O SENOR, pasobra Bo miserikordia ta bon; bira wak mi, konforme e grandesa di Bo kompashon,

¹⁷i no skonde Bo kara pa Bo sirbido, pasobra mi ta den angustia; kontestami lihe.

¹⁸Hala serka mi i redimimi; librami pa motibu di mi enemigunan!

¹⁹Bo konose mi reproche, mi berguensa i mi desonor; tur mi atversarionan ta Bo dilanti.

²⁰Reproche a kibra mi kurason, i mi ta sintimi malu. I mi tabata spera pa kompashon, ma no tabatin, i pa konsoladonan, ma mi no a hana ningun.

²¹Tambe nan a dunami hal pa kuminda, i pa mi set nan a dunami binager.

²²Laga nan mesa bira un laso nan dilanti; i loke tabata pa nan bon, laga esei bira un trampa.

²³Laga nan wowo bira skur, pa nan no mira, i hasi nan hep tembla kontinuamente.

²⁴Basha bo indignashon riba nan, i laga Bo rabia ardiente podera di nan.

²⁵Laga nan kampamentu keda desola; no laga ningun hende biba den nan tentnan.

²⁶Pasobra nan a persigui esun ku Bo mes a afligi, nan ta konta di e dolo di esnan ku Bo a herida.

²⁷Pone inikidat riba nan inikidat, i no laga nan drenta den Bo hustisia.

²⁸Laga nan wordu kita for di e buki di bida, i no laga nan wordu inskribi huntu ku e hustunan.

²⁹Ma ami ta afligi i yen di dolo; laga Bo salbashon, O Dios, protehami.

³⁰Lo mi alaba e nomber di Dios ku kantika, i lo mi engrandes'E ku gradisimentu.

³¹I esaki lo agrada SENOR mas ku un buey of un bishe machu ku tin kachu i huf.

³²E umildenan lo mira esaki i keda kontentu; boso ku ta buska Dios, boso kurason lo biba.

³³Pasobra SENOR ta tende esnan den nesesidat, i no ta despresia esnan di djé ku ta prezo.

³⁴Laga shelu i tera alab'E, lamannan i tur loke ta move den nan.

³⁵Pasobra Dios lo salba Sion i konstrui e statnan di Juda, asina ku nan por biba ayanan i bira dono di dje.

³⁶E desendientenan di Su sirbidonan lo ered'e, i esnan ku ta stima Su nomber lo biba den dje.