Read Papantla Totonac Salmonan 72 Bible Online

Salmonan 72 - Papantla Totonac bible

Salmonan 72

¹O Dios, duna rei Bo huisionan, i Bo hustisia na e yu homber di rei.

²Lagu'e huzga Bo pueblo ku hustisia, i Bo afliginan ku huisio.

³Laga e serunan trese pas na e pueblo, tambe e seritunan, den hustisia.

⁴Lagu'e huzga e afliginan di e pueblo, salba e yunan di esnan den nesesidat, i plecha e opresor.

⁵Laga nan tin temor di Bo, tanten ku tin solo i luna, durante di tur generashon.

⁶Lagu'e baha meskos ku awaseru riba yerba korta, meskos ku yobidanan ku ta muha tera.

⁷Den su dianan laga e hustu florese, i laga tin abundansia di pas te ora ku no tin luna mas.

⁸Lagu'e goberna tambe di laman pa laman, i for di Riu Eufrates te na e finnan di tera.

⁹Laga e tribunan di desierto buig su dilanti, i su enemigunan lembe stof

¹⁰Laga e reinan di Tarsis i di e islanan trese regalo; laga e reinan di Saba i Seba ofrese regalo.

¹¹Si, laga tur rei buig su dilanti, ku kara te na suela; laga tur nashon sirbie.

¹²Pasobra e lo libra esun den nesesidat ora ku e sklama pa yudansa, esun afligi tambe i esun ku no tin ningun hende pa yud'e.

¹³E lo tin kompashon di e pober i di esun den nesesidat, i e lo salba bida di esnan den nesesidat.

¹⁴E lo reskata nan bida for di opreshon i violensia; i nan sanger lo ta presioso den su bista.

¹⁵I e lo biba; i nan lo dun'e di e oro di Saba; nan lo hasi orashon p'e kontinuamente, i bendishon'e henter dia.

¹⁶Lo tin abundansia di mainshi den e tera, riba kabes di e serunan; su fruta lo zoya manera e palunan di seda di Libano; i esnan di e stat lo florese manera yerba di sabana.

¹⁷Su nomber lo permanese pa semper; su nomber lo kontinua tanten ku tin solo; i hende lo wordu bendishona den dje; i tur nashon lo yam'e bendishona.

¹⁸Bendishona sea SENOR Dios, e Dios di Israel, Kende so ta hasi maraviyanan.

¹⁹I bendishona sea Su nomber glorioso pa semper; i ku henter tera wordu yena ku Su gloria. Amen i Amen.

²⁰E orashonnan di David, yu homber di Isai, a termina.