Read Papantla Totonac Salmonan 77 Bible Online

Salmonan 77 - Papantla Totonac bible

Salmonan 77

¹Mi ta sklama na Dios ku mi bos; na Dios mi ta sklama, i E lo skuchami.

²Den e dia di mi angustia mi a buska Senor; den anochi mi a ekstende mi man sin kansa; mi alma no kier a wordu konsola.

³Ora mi korda riba Dios, mi ta keda konmovi; ora mi suspira, mi spiritu ta desmaya.

⁴Bo a tene mi wowonan habri; mi ta asina intrankil ku mi no por papia.

⁵Mi ta korda e dianan di prome aya, e ananan di hopi tempu pasa.

⁶Mi ta korda mi kantika den anochi; mi ta medita den mi kurason, i mi spiritu ta keda pensa.

⁷Senor lo rechasa pa semper? I lo E no mustra Su grasia nunka mas?

⁸Akaso Su miserikordia a termina pa semper? Su promesa a yega na un fin pa semper?

⁹Dios a lubida di ta miserikordioso? El a kita Su kompashon den Su rabia?

¹⁰Pesei mi a bisa: "Esaki ta mi tristesa, ku e man drechi di e Haltisimo a kambia."

¹¹Lo mi korda e echonan di SENOR; siguramente lo mi korda Bo maraviyanan di prome aya.

¹²Lo mi medita riba tur Bo obranan, i keda pensa riba Bo echonan.

¹³Bo kaminda, O Dios, ta santu; kual dios ta grandi manera nos Dios?

¹⁴Abo ta e Dios ku ta hasi maraviyanan; Abo a hasi Bo poder bira konosi meimei di e pueblonan.

¹⁵Abo a redimi Bo pueblo ku Bo poder, e yu hombernan di Jakob i Jose.

¹⁶E awanan a miraBo, O Dios; e awanan a miraBo, nan tabata den angustia; e profundidatnan tambe a tembla.

¹⁷E nubianan a basha awa; un zonidu tabata resona for di e shelunan; Bo flechanan tabata korta p'aki p'aya.

¹⁸E zonidu di Bo strena tabata den e warwaru; Bo lampernan tabata lusa mundu; tera tabata tembla i sakudi.

¹⁹Bo kaminda tabata den laman, i Bo berehanan den e awanan poderoso, i Bo lastronan no ta konosi.

²⁰Bo a guia Bo pueblo manera un tou di karne, pa medio di e man di Moises i Aaron.