Read Papantla Totonac Salmonan 78 Bible Online

Salmonan 78 - Papantla Totonac bible

Salmonan 78

¹Skucha mi sinansa, O mi pueblo, inklina boso oreanan na e palabranan di mi boka.

²Lo mi habri mi boka i papia den parabola; lo mi papia di kosnan skondi di prome aya

³ku nos a tende i tabata sa di dje, i ku nos tatanan a konta nos.

⁴Nos lo no tene nan skondi pa nan yunan, ma nos lo konta e generashon benidero di e alabansanan di SENOR, di Su forsa i di Su obranan maraviyoso ku El a hasi.

⁵Pasobra El a stablese un testimonio den Jakob, i a pone un lei den Israel, ku El a ordena nos tatanan, pa nan sina nan yunan esei;

⁶pa e generashon benidero por konose nan, esta, e yunan ku tin ku nase ainda, pa nan por lanta i konta nan yunan,

⁷pa nan por pone nan konfiansa den Dios, i no lubida e obranan di Dios, ma warda Su mandamentunan;

⁸i pa nan no ta manera nan tatanan, un generashon kabesura i rebelde, un generashon ku no a prepara su kurason, i su spiritu no tabata fiel na Dios.

⁹E yu hombernan di Efrain tabata tiradonan di flecha ekipa ku bog, tog nan a hal'atras den e dia di bataya.

¹⁰Nan no a warda e aliansa di Dios, i a nenga di kana den Su lei;

¹¹i nan a lubida Su echonan i Su milagernan ku El a mustra nan.

¹²El a hasi maraviyanan dilanti di nan tatanan, na tera di Egipto, den e kunuku di Soan.

¹³El a dividi laman, i a hasi nan pasa dor di dje; i El a hasi e awanan keda para manera un muraya.

¹⁴Anto di dia El a guia nan pa medio di un nubia, i henter anochi pa medio di un lus di kandela.

¹⁵El a spleit e barankanan den desierto, i a duna nan awa pa bebe, komo for di e profundidatnan di laman.

¹⁶Tambe El a laga koridanan di awa sali for di e baranka, i a hasi awa basha manera riu.

¹⁷Tog nan a sigui hasi pika kontra djé dor di rebeldia kontra e Haltisimo den desierto.

¹⁸I nan a tenta Dios den nan kurason dor di pidi kuminda segun nan deseo.

¹⁹Si, nan a papia kontra Dios; nan a puntra: "Dios por prepara un mesa den desierto?

²⁰Mira, El a dal e baranka, asina ku awa tabata brota bash'afo. I koridanan di awa tabata basha ofer. E por duna pan tambe? Lo E provee karni pa Su pueblo?"

²¹Pesei SENOR a tende i a rabia masha pisa, i un kandela a sende kontra Jakob, i tambe Su rabia a lanta kontra Israel;

²²pasobra nan no tabata kere den Dios, i no tabata konfia den Su salbashon.

²³Tog El a ordena e nubianan aya riba, i a habri e portanan di shelu;

²⁴i El a laga mana yobe riba nan pa nan kome, i a duna nan kuminda for di shelu.

²⁵Hende a kome pan di angel; El a manda nan kuminda na abundansia.

²⁶El a hasi bientu di pariba supla den e shelunan; i ku Su poder El a dirigi e bientu di suit.

²⁷El a laga karni yobe riba nan, manera stof-- parha ku hala, manera santu di laman.

²⁸I El a laga nan kai meimei di nan kampamentu, tur ront di nan habitashonnan.

²⁹Asina nan a kome i a keda barika yen; i El a kumpli ku nan deseo.

³⁰Prome ku nan a satisfase nan deseo, mientras ku nan kuminda tabata den nan boka ainda,

³¹e rabia di Dios a lanta kontra nan, i a mata algun di esnan di mas robusto, i a dal e hombernan skohi di Israel mata.

³²Apesar di tur esaki, nan a sigui hasi pika, i no a kere den Su obranan maraviyoso.

³³Pesei El a laga nan dianan kaba den banidat, i nan ananan den teror.

³⁴Ora ku El a mata nan, e ora ei nan a busk'E, i nan a bolbe i a buska Dios ku tur seriedat;

³⁵i nan a korda ku Dios tabata nan baranka, i e Dios Haltisimo, nan Redentor.

³⁶Ma nan a labi'E ku nan boka i a gan'E ku nan lenga.

³⁷Pasobra nan kurason no tabata firme pa kuné, ni nan no tabata fiel den Su aliansa.

³⁸Ma E, siendo miserikordioso, a pordona nan inikidat, i no a destrui nan; hopi biaha El a kita Su rabia for di riba nan, i no a lanta tur-tur Su furia.

³⁹Pasobra El a korda ku ta karni nan tabata, un rosea ku ta pasa bai i ku no ta bolbe.

⁴⁰Kuantu biaha nan a bira rebelde kontra djé den e tera seku, i a hasié tristu den desierto!

⁴¹Bes tras bes nan a tenta Dios, i a proboka Esun Santu di Israel.

⁴²Nan no a korda riba Su poder, ni e dia ku El a libra nan for di e atversario,

⁴³tempu ku El a hasi Su senalnan na Egipto, i Su maraviyanan den e kunuku di Soan,

⁴⁴i a hasi nan riunan bira sanger, i tambe nan koridanan di awa, asina ku nan no por a bebe.

⁴⁵El a manda muskanan na kantidat meimei di nan, ku a devora nan, i dorinan, ku a destrui nan.

⁴⁶Tambe El a entrega nan kosechanan na tirakochi maron, i e frutanan di nan trabou na tirakochi berde.

⁴⁷El a destrui nan matanan di wendruif ku hagel, i nan palunan di sikamor ku frost.

⁴⁸Tambe El a entrega nan bakanan na hagel, i nan krianan di bestia chikitu na rayo di lamper.

⁴⁹El a manda Su rabia ardiente riba nan, furia, indignashon i angustia, un ehersito di angel ku ta destrui.

⁵⁰El a traha un bereha pa Su rabia; E no a spar nan alma for di morto, ma a entrega nan bida na pestilensia, i a

⁵¹mata tur primogenito na Egipto, e prome fruta di nan forsa den e tentnan di Kam.

⁵²Ma Su pueblo El a hasi sali manera karne, i a guia nan den desierto manera un kria di bestia chikitu.

⁵³El a guia nan ku siguridat, asina ku nan no tabatin miedu; ma nan enemigunan, laman a tapa nan.

⁵⁴Asina El a hiba nan na Su tera santu, na e seru aki ku Su man drechi a konkista.

⁵⁵Tambe El a kore ku e nashonnan dilanti di nan, i a parti un erensia pa nan segun midi, i a hasi e tribunan di

⁵⁶Sinembargo, nan a rebeldia kontra e Dios Haltisimo, i no a warda Su testimonionan,

⁵⁷ma a hal'atras i a trata infiel, meskos ku nan tatanan; nan a desvia manera un bog enganoso,

⁵⁸nan a probok'E na rabia ku nan luganan haltu, i a hasié yalurs ku nan imagennan graba.

⁵⁹Ora ku Dios a tende, El a rabia masha pisa, i a hana un odio masha grandi mes pa Israel,

⁶⁰asina ku El a bandona e luga di biba na Silo, e tent ku El a pone meimei di hende;

⁶¹i a entrega Su forsa na koutiverio, i Su gloria den man di e atversario.

⁶²Tambe El a entrega Su pueblo na spada, i a rabia masha pisa ku Su erensia.

⁶³Kandela a devora nan hobennan, i no tabatin kantika di bruit pa Su birgennan.

⁶⁴Su saserdotenan a kai pa medio di spada; i Su biudanan no por a yora.

⁶⁵E ora ei Senor a lanta manera for di sono, manera un guerero bou di influensia di bina.

⁶⁶I El a kore ku Su enemigunan pone nan hal'atras; El a pone nan na reproche perpetuo.

⁶⁷Tambe El a rechasa e tent di Jose, i no a skohe e tribu di Efrain,

⁶⁸ma a skohe e tribu di Juda, Seru Sion, ku E tabata stima.

⁶⁹I El a traha Su santuario manera e halturanan, manera e mundu ku El a stablese pa semper.

⁷⁰Tambe El a skohe Su sirbido David, i a sak'e for di e kura-di-karne,

⁷¹for di tras di e karnenan ku a kaba di werp El a tres'e, pa pastoria Jakob, Su pueblo, i Israel, Su erensia.

⁷²Asina el a pastoria nan segun e integridat di su kurason, i a guia nan ku su mannan eksperto.