Read Papantla Totonac Salmonan 85 Bible Online

Salmonan 85 - Papantla Totonac bible

Salmonan 85

¹O SENOR, Bo a faborese Bo tera; Bo a trese esnan di Jakob, ku tabata den koutiverio, bek.

²Bo a pordona e inikidat di Bo pueblo; Bo a tapa tur nan pikanan.

³Bo a kita tur Bo furia; Bo a bira for di Bo rabia ardiente.

⁴Restora nos, O Dios di nos salbashon, i pone un fin na Bo indignashon kontra nos.

⁵Lo Bo keda rabia ku nos pa semper? Lo Bo laga Bo rabia sigui dura di generashon pa generashon?

⁶Lo Bo no rebiba nos atrobe, pa Bo pueblo por regosiha den Bo?

⁷Mustra nos Bo miserikordia, O SENOR, i duna nos Bo salbashon.

⁸Lo mi tende loke Dios e SENOR ta bisa, pasobra E lo papia pas na Su pueblo, na Su santunan; ma no laga nan bolbe na lokura atrobe.

⁹Siguramente Su salbashon ta serka di esnan ku ta tem'E, pa gloria por biba den nos tera.

¹⁰Miserikordia i berdat a kontra ku otro; hustisia i pas a sunchi otro.

¹¹Berdat ta brota for di tera; i hustisia ta wak abou for di shelu.

¹²Si, SENOR lo duna loke ta bon; i nos tera lo duna su fruta.

¹³Hustisia lo bai Su dilanti, i lo hasi Su pasonan bira un kaminda.