Read Papantla Totonac Salmonan 89 Bible Online

Salmonan 89 - Papantla Totonac bible

Salmonan 89

¹Lo mi kanta di e miserikordia di SENOR pa semper; ku mi boka lo mi hasi Bo fieldat konosi na tur generashon.

²Pasobra mi a bisa: "Miserikordia lo wordu edifika pa semper; lo Bo stablese Bo fieldat den e shelunan."

³"Mi a sera un aliansa ku Mi skohi; Mi a hura na David, Mi sirbido:

⁴'Lo Mi stablese bo simia pa semper, i edifika bo trono pa tur generashon.'"

⁵I e shelunan lo alaba Bo maraviyanan, O SENOR; tambe Bo fieldat den e asamblea di e santunan.

⁶Pasobra ta ken den e shelunan por ta di kompara ku SENOR? Ta ken entre e yunan di e poderosonan ta manera SENOR?

⁷Den e asamblea di e santunan Dios ta grandemente temi; E ta mas temibel ku tur esnan ku ta ront di djé.

⁸O Senor DIOS di ehersitonan, ken ta manera Bo, O SENOR poderoso? I Bo fieldat ta rondonaBo.

⁹Bo ta goberna e laman brabu; ora su olanan lanta, Bo ta kalma nan.

¹⁰Abo mes a plecha Rahab lagu'e manera un hende ku a wordu mata; Bo a plama Bo enemigunan ku Bo brasa poderoso.

¹¹E shelunan ta di Bo, tera tambe ta di Bo; mundu i tur loke ku e ta kontene, Abo a funda nan.

¹²Nort i suit, Abo a krea nan; Tabor i Hermon ta grita di alegria ora nan tende Bo nomber.

¹³Bo tin un brasa fuerte; Bo man ta poderoso, Bo man drechi ta halsa.

¹⁴Hustisia i huisio ta e fundeshi di Bo trono; miserikordia i berdat ta bai Bo dilanti.

¹⁵Bendishona ta e pueblo ku konose e zonidu gososo! Nan ta kana, O SENOR, den e lus di Bo semblante.

¹⁶Den Bo nomber nan ta regosiha henter dia, i pa medio di Bo hustisia nan ta wordu halsa.

¹⁷Pasobra Abo ta e gloria di nan fortalesa, i pa medio di Bo grasia nos kachu ta wordu halsa.

¹⁸Pasobra nos eskudo ta pertenese na SENOR, i nos rei na Esun Santu di Israel.

¹⁹Un biaha Bo a papia den vishon ku Bo santunan, i a bisa: "Mi a duna yudansa na un di e poderosonan; Mi a halsa un di e skohinan for di entre e pueblo.

²⁰Mi a hana David, Mi sirbido; ku Mi zeta santu Mi a ungie.

²¹Mi man lo ta semper kune; Mi brasa tambe lo fortifik'e.

²²E enemigu lo no por eksigi nada for di dje, ni e yu di maldat lo no afligie.

²³Ma lo Mi plecha su atversarionan su dilanti, i derota esnan ku ta odi'e.

²⁴Ma Mi fieldat i Mi miserikordia lo ta kune, i den Mi nomber su kachu lo wordu halsa.

²⁵Tambe lo Mi pone su man riba e laman, i su man drechi riba e riunan.

²⁶E lo sklama na Mi: 'Abo ta mi Tata, mi Dios, i e baranka di mi salbashon.'

²⁷Tambe lo Mi hasie Mi primogenito, esun mas haltu di e reinan di tera.

²⁸Pa semper lo Mi konserva Mi miserikordia p'e, i Mi aliansa kune lo keda firme.

²⁹I lo Mi stablese su desendientenan pa semper, i su trono manera e dianan di shelu.

³⁰"Si su yunan bandona Mi lei, i no kana den Mi huisionan,

³¹si nan viola Mi statutonan, i no warda Mi mandamentunan,

³²e ora ei lo Mi kastiga nan transgreshonnan ku bara, i nan inikidat ku sota.

³³Ma lo Mi no kita Mi miserikordia for di dje, ni permiti Mi fieldat faya.

³⁴Lo Mi no viola Mi aliansa, ni kambia loke ta sali for di Mi lepnan.

³⁵Un biaha Mi a hura pa Mi mes santidat; lo Mi no gana David.

³⁶Su desendientenan lo permanese pa semper, i su trono lo permanese manera solo Mi dilanti.

³⁷E lo ta stablesi pa semper manera luna, i e testigu na shelu ta fiel."

³⁸Ma Abo a rechasa i a aborese, Bo tabata yen di furia kontra Bo ungi;

³⁹Bo a despresia e aliansa di Bo sirbido, Bo a profana su korona i a bent'e abou na suela;

⁴⁰Bo a kibra tur su murayanan bash'abou, Bo a hasi su luganan fortifika bira un ruina;

⁴¹tur hende ku pasa pa e kaminda ei ta plunder e, el a bira un reproche pa su bisinanan;

⁴²Bo a halsa e man drechi di su atversarionan, Bo a hasi tur su enemigunan regosiha;

⁴³tambe Bo a dobla e filo di su spada, i no a sosten'e den bataya;

⁴⁴Bo a pone un fin na su splendor, i a tira su trono abou na suela;

⁴⁵Bo a hasi e dianan di su hubentut mas kortiku, Bo a kubrie ku berguensa.

⁴⁶Kuantu tempu mas, O SENOR? Lo Bo skonde Bo mes pa semper? Bo furia lo kima manera kandela?

⁴⁷Korda kon kortiku mi bida ta, pa ki banidat Bo a krea tur yu di hende!

⁴⁸Ken ta e hende ku lo biba i no mira morto? E por libra su alma for di e poder di Seol?

⁴⁹O Senor, unda Bo miserikordianan di antes ta, ku Bo a hura na David den Bo fieldat?

⁵⁰Korda, O Senor, e reproche di Bo sirbidonan, kon mi ta karga e reproche di hopi pueblo den mi bus,

⁵¹ku kual Bo enemigunan a reprocha, O SENOR, ku kual nan a reprocha e pasonan di Bo ungi.

⁵²Bendishona sea SENOR pa semper! Amen i Amen.