Read Papantla Totonac Salmonan 9 Bible Online

Salmonan 9 - Papantla Totonac bible

Salmonan 9

¹Lo mi alabaBo, O SENOR, ku henter mi kurason; lo mi konta di tur Bo maraviyanan.

²Lo mi ta kontentu i regosiha den Bo; lo mi kanta alabansa na Bo nomber, O Haltisimo.

³Ora mi enemigunan hal'atras, nan ta trompeka i perese Bo dilanti.

⁴Pasobra Bo a mantene mi kaso i mi derecho; Bo ta sinta riba trono i ta huzga ku hustisia.

⁵Bo a reprende e nashonnan, Bo a destrui e malbadonan; Bo a kita nan nomber pa semper i semper.

⁶E enemigu a yega na un fin den ruina perpetuo, i Bo a destrui e statnan; asta e rekuerdo di nan a perese.

⁷Ma SENOR ta permanese pa semper; El a stablese Su trono pa huisio,

⁸i E lo huzga mundu ku hustisia; ku rektitut E lo ehekuta huisio pa e pueblonan.

⁹Tambe SENOR lo ta un refugio pa e oprimman, un refugio den tempunan di angustia.

¹⁰I esnan ku konose Bo nomber lo pone nan konfiansa den Bo, pasobra Abo, O SENOR, no a bandona esnan ku ta buskaBo.

¹¹Kanta alabansa na SENOR, Kende ta biba na Sion; deklara Su echonan meimei di e pueblonan.

¹²Pasobra Esun ku ta eksigi sanger ta korda riba nan; E no ta lubida e sklamashon di esnan afligi.

¹³Tene miserikordia di mi, O SENOR; mira mi aflikshon ku mi ta sufri na man di esnan ku ta odiami, Abo ku ta lantami for di e portanan di morto,

¹⁴pa mi por konta di tur Bo alabansanan, asina ku den e portanan di e yu muhe di Sion mi por regosiha den Bo salbashon.

¹⁵E nashonnan a senk den e buraku ku nan mes a koba; den e reda ku nan a skonde, nan mes pia a keda pega.

¹⁶SENOR a hasi Su mes konosi; El a ehekuta huisio. Den e obra di su mes mannan e malbado ta wordu atrapa.

¹⁷E malbadonan lo bolbe na Seol, sf tur e nashonnan ku ta lubida Dios.

¹⁸Pasobra esun den nesesidat lo no keda lubida pa semper; tampoko e speransa di esnan afligi lo no perese pa semper.

¹⁹Lanta, O SENOR, no laga hende triunfa; laga e nashonnan wordu huzga den Bo presensia.

²⁰Hinka miedu den nan, O SENOR; laga e nashonnan sa ku ta simplemente hende nan ta.