Read Papantla Totonac Salmonan 90 Bible Online

Salmonan 90 - Papantla Totonac bible

Salmonan 90

¹SENOR, Bo tabata un refugio pa nos den tur generashon.

²Prome ku e serunan a nase, i ku Bo a forma tera i mundu, si, for di eternidat te na eternidat, Abo ta Dios.

³Bo ta hasi hende bolbe na stof, i ta bisa: "Bolbe, O yunan di hende."

⁴Pasobra mil ana den Bo bista ta manera e dia di ayera ku a pasa bai, of manera un warda di anochi.

⁵Bo ta spula nan bai kune manera un diluvio; nan ta manera un sono. Mainta nan ta manera yerba ku ta krese di nobo.

⁶Mainta e ta florese i ta spreit di nobo; atardi e ta marchita i ta seka.

⁷Pasobra Bo rabia a kaba ku nos, i dor di Bo furia nos a keda terorisa.

⁸Bo a pone nos inikidatnan Bo dilanti, nos pikanan sekreto den e lus di Bo presensia.

⁹Pasobra tur nos dianan a pasa den Bo furia; nos a termina nos ananan manera un suspiro.

¹⁰E dianan di nos bida ta setenta ana, of si hende tin hopi forsa, ochenta ana; tog nan orguyo no ta nada otro ku molester i pena, pasobra un djis el a pasa, i nos ta bula bai.

¹¹Ta ken ta komprende e poder di Bo rabia, i Bo furia, konforme e reverensia ku Bo merese?

¹²Asina anto, sina nos konta nos dianan, pa nos por presenta na Bo un kurason yen di sabiduria.

¹³Bolbe, O SENOR; kuantu tempu mas? Tene duele di Bo sirbidonan.

¹⁴O satisfase nos den mainta ku Bo miserikordia, ku nos por kanta di goso i ta kontentu tur nos dianan.

¹⁵Hasi nos kontentu konforme e dianan ku Bo a afligi nos, konforme e ananan ku nos a mira maldat.

¹⁶Revela Bo obra na Bo sirbidonan, i Bo gloria na nan yunan.

¹⁷I laga e grasia di Senor nos Dios keda riba nos, i konfirma e obra di nos mannan pa nos, si, konfirma e obra di nos mannan.