Read Papantla Totonac Proverbionan 1 Bible Online

Proverbionan 1 - Papantla Totonac bible

Proverbionan 1

¹E proverbionan di Salomon, yu homber di David, rei di Israel:

²pa konose sabiduria i instrukshon, pa diserni e dichonan di komprendementu,

³pa risibi instrukshon den kondukta prudente, hustisia, huisio i rektitut;

⁴pa duna prudensia na e simpelnan, konosementu i disernimentu na e hobennan--

⁵un hende sabi lo tende i lo oumenta su konosementu, i un hende di komprendementu lo atkiri bon konseho--

⁶pa komprende proverbio i parabola, palabranan di e sabinan i nan charadanan.

⁷E temor di SENOR ta e prinsipio di konosementu; bobonan ta despresia sabiduria i instrukshon.

⁸Mi yu, tende e instrukshon di bo tata, i no bandona e sinansa di bo mama;

⁹pasobra nan lo ta un bunita adorno pa bo kabes, i koyarnan na bo garganta.

¹⁰Mi yu, si pekadonan tentabo, no konsenti.

¹¹Si nan bisa: "Ban ku nos, laga nos skonde lur pa drama sanger, laga nos skonde ataka e inosentenan sin motibu;

¹²laga nos traga nan bibu, manera Seol, i hente, manera esnan ku ta baha den graf;

¹³nos lo hana tur sorto di rikesa presioso, nos lo yena nos kasnan ku botin;

¹⁴purba bo suerte ku nos, nos tur lo tin un solo saku di plaka"--

¹⁵mi yu, no anda ku nan. No laga bo pia kohe nan kaminda,

¹⁶pasobra nan pia ta kore bai na maldat, i nan ta lihe pa drama sanger.

¹⁷Berdaderamente, span net den bista di parha ta trabou pornada;

¹⁸ma nan ta skonde lur pa drama nan mes sanger; nan ta skonde ataka nan mes bida.

¹⁹Asina ta e kamindanan di kada un ku ta golos pa ganashi, kual ta kita bida di esnan ku ta dono di dje.

²⁰Sabiduria ta sklama den kaya, e ta halsa su bos riba plenchi;

²¹na skina di kayanan druk e ta sklama; na entrada di e portanan den e stat e ta trese su mensahe:

²²"Kuantu tempu mas, O simpelnan, boso lo stima simplisidat, i bofonadonan lo tin delisia den hasimentu di bofon, i bobonan lo odia sabiduria?

²³Bolbe na mi reprendementu! Mira, lo mi drama mi spiritu riba boso; lo mi hasi mi palabranan konosi na boso.

²⁴Pasobra mi a yama i boso a nenga; mi a saka mi man i ningun hende no a hasi kaso.

²⁵Ma boso a neglisha tur mi konseho, i no tabata kier mi reprendementu;

²⁶tambe lo mi hari boso kalamidat; lo mi hasi bofon ora miedu bin riba boso,

²⁷ora boso miedu bin manera un tempestat, i boso kalamidat bin manera warwaru, ora ku ansha i angustia bin riba boso.

²⁸"E ora ei nan lo yamami, ma lo mi no kontesta; nan lo buskami ku diligensia, ma nan lo no hanami,

²⁹pasobra nan tabata odia konosementu, i no a skohe pa e temor di SENOR.

³⁰Nan no kier a asepta mi konseho, nan a rechasa tur mi reprendementu.

³¹Pesei nan lo kome di e fruta di nan mes kondukta, i lo keda yen di nan mes komplotnan.

³²Pasobra e desviashon di e simpelnan lo mata nan, i e negligensia di e bobonan lo destrui nan.

³³Ma esun ku skuchami lo biba konfiadamente, i lo biba trankil, sin miedu di maldat."