Read Papantla Totonac Proverbionan 10 Bible Online

Proverbionan 10 - Papantla Totonac bible

Proverbionan 10

¹E proverbionan di Salomon: Un yu sabi ta hasi su tata kontentu, ma un yu bobo ta un tristesa pa su mama.

²Tesoronan hana ku maldat no ta duna probecho, ma hustisia ta libra for di morto.

³SENOR lo no permiti pa e hustu pasa hamber, ma deseo di e malbado E ta tira un banda.

⁴Esun ku traha ku man negligente ta bira pober, ma man di e balente ta hasi riku.

⁵Esun ku rekohe den zomer ta un yu sabi, ma esun ku drumi den tempu di kosecha ta un yu ku ta kousa berguensa.

⁶Tin bendishon riba kabes di e hustu, ma violensia ta tapa boka di e malbado.

⁷Rekuerdo di e hustu ta bendishona, ma nomber di e malbado lo putri.

⁸Esun sabi di kurason lo asepta mandamentunan, ma un bobo ku ta papia hopi lo wordu benta abou.

⁹Esun ku kana den rektitut ta kana konfiadamente, ma esun ku perverti su kamindanan lo wordu deskubri.

¹⁰Esun ku kinipi wowo ta kousa problema, i un bobo ku ta papia hopi lo wordu benta abou.

¹¹Boka di e hustu ta un fuente di bida, ma violensia ta tapa boka di e malbado.

¹²Odio ta lanta pleitu, ma amor ta tapa tur pika.

¹³Sabiduria ta wordu hana riba lep di esun ku tin komprendementu, ma bara ta pa lomba di esun ku falta komprendementu.

¹⁴E hende sabi ta montona sabiduria, ma boka di e bobo ta destrukshon serkano.

¹⁵Rikesa di e hende riku ta su forti; destrukshon di e pobernan ta nan pobresa.

¹⁶Labor di e hustu ta kondusi na bida, fruta di e malbado ta kondusi na kastigu.

¹⁷Esun ku tene kuenta ku instrukshon ta riba e bereha di bida, ma esun ku rechasa reprendementu ta kana dwal.

¹⁸Esun ku skonde odio tin lepnan mentiroso, i esun ku plama kalumnia ta un bobo.

¹⁹Ora tin hopi papiamentu, pika no ta falta, ma esun ku frena su lepnan ta sabi.

²⁰Lenga di e hustu ta manera plata puru; kurason di e malbado ta di poko balor.

²¹Lepnan di e hustu ta alimenta hopi hende, ma e bobo ta muri pa falta di komprendementu.

²²Ta e bendishon di SENOR ta hasi riku, i E no ta agrega tristesa na dje.

²³Meskos ku hasimentu di maldat ta dibertishon pa e malbado, asina sabiduria ta pa un hende di komprendementu.

²⁴Loke e malbado ta teme lo bin riba dje, i deseo di e hustu lo wordu duna na dje.

²⁵Ora warwaru pasa, e malbado no t'ei mas, ma e hustu tin un fundeshi eterno.

²⁶Manera binager ta pa djente i huma pa wowo, asina e floho ta pa esnan ku ta mand'e.

²⁷E temor di SENOR ta prolonga bida, ma ananan di e malbado lo wordu hasi kortiku.

²⁸E speransa di e hustu ta alegria, ma e ekspektativa di e malbado lo perese.

²⁹E kaminda di SENOR ta un fortalesa pa e rekto, ma e lo ta destrukshon pa e hasidonan di inikidat.

³⁰E hustu nunka lo wordu movi, ma e malbado lo no biba den e tera.

³¹Boka di e hustu ta produsi sabiduria, ma lenga perverso lo wordu korta afo.

³²Lepnan di e hustu ta produsi loke ta aseptabel, ma boka di e malbado, loke ta perverso.