Read Papantla Totonac Proverbionan 11 Bible Online

Proverbionan 11 - Papantla Totonac bible

Proverbionan 11

¹Un balansa enganoso ta abominashon pa SENOR, ma un peso hustu ta Su delisia.

²Ora ku orguyo bin, desonor tambe ta bin, ma sabiduria ta serka e umildenan.

³Integridat di e rektonan lo guia nan, ma perversidat di e traidonan lo destrui nan.

⁴Rikesa no ta di probecho den e dia di rabia, ma hustisia ta libra for di morto.

⁵Hustisia di e hende perfekto lo dirigi su kaminda, ma e malbado lo kai pa medio di su mes maldat.

⁶Hustisia di e hendenan rekto lo libra nan, ma e traidonan lo wordu atrapa den nan mes golosidat.

⁷Ora ku un hende malbado muri, su ekspektativa lo perese, i e speransa di hende inhustu ta perese.

⁸E hustu ta wordu libra for di tribulashon, ma e malbado ta tuma su luga.

⁹Un hipokrit ta destrui su prohimo ku su boka, ma pa medio di sabiduria e hustu lo wordu libra.

¹⁰Ora ta bai bon ku e hustu, e stat ta regosiha; i ora ku e malbado perese tin gritu di alegria.

¹¹Pa medio di e bendishon di e hendenan rekto e stat ta wordu halsa, ma pa medio di boka di e malbado e ta keda trastorna.

¹²Esun ku despresia su prohimo ta falta huisio, ma un hende ku komprendementu ta keda ketu.

¹³Esun ku ta kana hasi redu ta saka sekreto, ma esun ku ta di konfia ta tapa e asunto.

¹⁴Kaminda no tin guiansa, e pueblo ta kai, ma kaminda tin hopi konsehero tin viktoria.

¹⁵Esun ku para borg pa un stranhero siguramente lo sufri pa esei, ma esun ku no ta gusta para borg lo ta sigur.

¹⁶Un muhe amabel ta optene onor, i hombernan violento ta optene rikesa.

¹⁷E hende miserikordioso ta hasi bon na su mes alma, ma e hende kruel ta tormenta su mes karni.

¹⁸E malbado ta risibi pago enganoso, ma esun ku sembra hustisia ta hana un rekompensa berdadero.

¹⁹Esun ku para firme den hustisia lo optene bida, i esun ku sigui maldat lo kousa su mes morto.

²⁰Esnan ku ta di kurason perverso ta un abominashon pa SENOR, ma esnan perfekto den nan kaminda ta Su delisia.

²¹Siguramente e hende malbado lo no keda sin kastigu, ma e desendientenan di e hustu lo wordu libra.

²²Manera un renchi di oro den snuit di porko, asina un muhe bunita sin diskreshon ta.

²³Deseo di e hustu ta resulta den kos bon so, ma ekspektativa di e malbado ta resulta den furia so.

²⁴Tin ku ta reparti i tog ta hana mas; tin ku ta retene mas di loke ta hustu, ma tog ta resulta den pobresa.

²⁵E hende generoso lo prospera, i esun ku duna di bebe tambe lo hana di bebe.

²⁶Esun ku tene mainshi atras, pueblo lo maldishon'e, ma bendishon lo ta riba kabes di esun ku ta bende mainshi.

²⁷Esun ku diligentemente buska loke ta bon ta buska fabor, ma esun ku buska maldat, maldat lo bin riba dje.

²⁸Esun ku konfia den su rikesa lo kai, ma e hustu lo florese manera blachi berde.

²⁹Esun ku tormenta su mes kas lo ereda bientu, i e bobo lo ta sirbido di esun ku ta sabi di kurason.

³⁰Fruta di e hustu ta un palu di bida, i esun ku ta sabi ta gana alma.

³¹Si e hustu wordu rekompensa riba tera, kuantu mas e malbado i e pekado!