Read Papantla Totonac Proverbionan 12 Bible Online

Proverbionan 12 - Papantla Totonac bible

Proverbionan 12

¹Esun ku ta stima disiplina ta stima konosementu, ma esun ku ta odia reprendementu ta bobo.

²Un bon hende lo risibi grasia serka SENOR, ma un hende ku plania maldat E lo kondena.

³Un hende lo no wordu stablesi pa medio di maldat, ma rais di e hustu nunka lo no wordu movi.

⁴Un muhe birtuoso ta e korona di su esposo, ma e muhe ku ta kousa berguensa ta manera putrimentu den su wesunan.

⁵E pensamentunan di e hustunan ta korekto, ma e konsehonan di e malbadonan ta enganoso.

⁶E palabranan di e malbadonan ta skonde warda pa drama sanger, ma boka di e hustunan lo libra nan.

⁷E malbadonan ta wordu trastorna i no t'ei mas, ma kas di e hustunan lo permanese.

⁸Un hende lo wordu elogia segun su sabiduria, ma un hende di kurason perverso lo wordu despresia.

⁹Miho ta esun ku ta wordu menospresia, i tog tin un sirbido, ku esun ku ta hasi su mes grandi, i tin falta di pan.

¹⁰Un hende hustu ta kuida bida di su bestia, ma kompashon di e malbadonan ta kruel.

¹¹Esun ku kultiva su tera lo tin pan na kantidat, ma esun ku kore tras di banidat tin falta di komprendementu.

¹²E malbado ta desea e botin di hende malbado, ma rais di e hustunan ta duna fruta.

¹³Un hende malbado ta kai den trampa dor di transgreshon di su lepnan, ma e hustu lo skapa for di tribulashon.

¹⁴Un hende lo wordu sasia ku bondat dor di e fruta di su boka, i e echonan di man di un hende lo bolbe bek na dje.

¹⁵E kaminda di un bobo ta korekto den su mes bista, ma un hende sabi ta esun ku ta skucha konseho.

¹⁶Rabia di un bobo ta keda riparabel mesora, ma un hende prudente no ta hiba insulto na kuenta.

¹⁷Esun ku ta papia berdat ta konta loke ta korekto, ma un testigu falsu ta papia mentira.

¹⁸Tin hende ta papia sin pensa, manera hinka di spada, ma lenga di hende sabi ta trese kuramentu.

¹⁹Lepnan ku ta papia berdat lo ta stablesi pa semper, ma un lenga mentiroso ta pa un momento so.

²⁰Tin engano den kurason di esnan ku ta plania maldat, ma konseheronan di pas tin goso.

²¹Lo no pasa nada malu ku e hustu, ma e malbadonan ta yen di problema.

²²Lepnan mentiroso ta un abominashon pa SENOR, ma esnan ku ta trata ku fieldat ta Su delisia.

²³Un hende prudente ta keda ketu tokante di su konosementu, ma kurason di bobonan ta proklama lokura.

²⁴Man di e hende balente lo goberna, ma negligensia ta hiba na trabou forsa.

²⁵Ansha den kurason di hende ta hasie abati, ma un bon palabra ta hasie kontentu.

²⁶E hustu ta un guia pa su prohimo, ma kaminda di e malbadonan ta hasi nan kana dwal.

²⁷E floho no ta hasa loke el a kohe ku yagmentu, ma diligensia ta e poseshon presioso di hende.

²⁸Den e kaminda di hustisia tin bida, i den e kaminda ei no tin morto.