Read Papantla Totonac Proverbionan 15 Bible Online

Proverbionan 15 - Papantla Totonac bible

Proverbionan 15

¹Un kontesta suave ta kita rabia, ma un palabra skerpi ta lanta rabia.

²Lenga di e sabinan ta uza konosementu korektamente, ma boka di e bobonan ta brota lokura.

³E wowonan di SENOR ta tur kaminda, vigilando malu i bon.

⁴Un lenga suave ta un palu di bida, ma perversidat den dje ta kibra e spiritu.

⁵Un bobo ta despresia disiplina di su tata, ma esun ku asepta reprendementu ta prudente.

⁶Den kas di e hustu tin hopi rikesa, ma den ganashi di e malbado tin problema.

⁷Lepnan di e sabinan ta plama konosementu, ma kurason di e bobonan no ta hasi asina.

⁸Sakrifisio di e malbadonan ta abominashon pa SENOR, ma orashon di e rektonan ta Su delisia.

⁹Kaminda di e malbado ta abominashon pa SENOR, ma E ta stima esun ku ta sigui hustisia.

¹⁰Disiplina severo ta pa esun ku bandona e kaminda; esun ku ta odia reprendementu lo muri.

¹¹Seol i Abadon ta dilanti di SENOR, kuantu mas e kurasonnan di hende!

¹²Un hasido di bofon no ta stima esun ku reprend'e, ni e lo no bai serka e sabinan.

¹³Un kurason alegre ta hasi kara kontentu, ma ora ku e kurason ta tristu, e spiritu ta kibra.

¹⁴Kurason di esun ku tin komprendementu ta buska konosementu, ma boka di e bobo ta alimenta su mes ku lokura.

¹⁵Tur e dianan di esun ku ta afligi ta malu, ma esun di kurason kontentu semper tin fiesta.

¹⁶Miho djis un tiki, ku e temor di SENOR, ku gran tesoro, i problema huntu kune.

¹⁷Miho un tayo di berdura kaminda tin amor, ku un toro gorda i odio huntu kune.

¹⁸Un hende ku ta rabia lihe ta lanta pleitu, ma esun ku no ta rabia lihe ta kalma pleitu.

¹⁹Kaminda di e floho ta manera un trankera di sumpina, ma bereha di e rektonan ta un kaminda grandi.

²⁰Un yu homber sabi ta hasi su tata kontentu, ma un homber bobo ta despresia su mama.

²¹Bobedat ta alegria pa esun ku falta komprendementu, ma un hende di komprendementu ta kana den rektitut.

²²Pa falta di konseho plannan ta frakasa, ma ku hopi konsehero nan ta wordu logra.

²³Un hende tin alegria ora ku e duna un bon kontesta, i ki bon ta un palabra duna na ora!

²⁴E bereha di bida ta subi bai ariba pa esun sabi, asina ku e por keda leu for di Seol abou.

²⁵SENOR lo destrui kas di e orguyosonan, ma E lo stablese frontera di e biuda.

²⁶Plannan di maldat ta un abominashon pa SENOR, ma palabranan agradabel ta puru.

²⁷Esun ku ta haragan pa ganashi ta tormenta su mes kas, ma esun ku ta odia plaka pasa bou di mesa lo biba.

²⁸Kurason di e hustu ta studia bon kon pa kontesta, ma for di boka di e malbadonan ta brota maldat.

²⁹SENOR ta leu for di e malbadonan, ma E ta tende orashon di e hustunan.

³⁰Wowo ku ta briya ta alegra kurason; bon notisia ta hasi wesu salu.

³¹Orea ku ta skucha reprendementu di bida lo biba meimei di e sabinan.

³²Esun ku neglisha disiplina ta despresia su mes alma, ma esun ku skucha reprendementu ta atkiri komprendementu.

³³E temor di SENOR ta instrukshon pa sabiduria, i prome ku onor ta bin umildat.