Read Papantla Totonac Proverbionan 16 Bible Online

Proverbionan 16 - Papantla Totonac bible

Proverbionan 16

¹E plannan di kurason ta pertenese na hende, ma e kontesta di lenga ta bin di SENOR.

²Tur e kamindanan di un hende ta limpi den su mes bista, ma SENOR ta pisa e motibunan.

³Enkomenda bo obranan na SENOR, i bo plannan lo wordu stablesi.

⁴SENOR a traha tur kos ku un proposito, si, asta e malbado pa e dia di kalamidat.

⁵Kada hende ku ta orguyoso di kurason ta un abominashon pa SENOR; siguramente e lo no keda sin kastigu.

⁶Pa medio di miserikordia i berdat inikidat ta wordu ekspia, i pa medio di e temor di SENOR hende ta keda leu for di maldat.

⁷Ora ku un hende su kaminda ta agrada SENOR, E ta pone asta su enemigunan keda na pas kune.

⁸Miho un tiki ku hustisia, ku gran entrada ku inhustisia.

⁹E mente di un hende ta plania su kaminda, ma SENOR ta dirigi su pasonan.

¹⁰Un sentensia dibino ta riba lep di rei; su boka no mester faya ora ku e ta huzga.

¹¹Peso i balansa hustu ta di SENOR, tur e piedranan-pa-pisa, ku ta den e saku, ta Su obra.

¹²Ta un abominashon pa reinan hasi maldat, pasobra un trono ta wordu stablesi riba hustisia.

¹³Lepnan hustu ta e delisia di reinan, i nan ta stima esun ku ta papia loke ta korekto.

¹⁴Rabia di un rei ta manera mensaheronan di morto, ma un hende sabi lo kalma esaki.

¹⁵Den e lus riba kara di rei tin bida, i su grasia ta manera un nubia di awaseru di primavera.

¹⁶Kuantu mas miho ta pa hana sabiduria ku pa hana oro! I pa hana komprendementu ta di prefera riba plata.

¹⁷Kaminda grandi di e rektonan ta: pa aparta bo mes for di maldat; esun ku paga tino kon e ta kana ta preserva su alma.

¹⁸Orguyo ta bin prome ku destrukshon, i un spiritu arogante prome ku kaida.

¹⁹Ta miho pa ta di un spiritu umilde huntu ku e umildenan, ku parti botin ku e orguyosonan.

²⁰Esun ku paga tino na e palabra lo hana bondat, i bendishona ta esun ku ta konfia den SENOR.

²¹Esun di kurason sabi lo wordu yama prudente, i palabranan agradabel ta promove konosementu.

²²Komprendementu ta un fuente di bida pa esun ku tin e, ma e disiplina di hende bobo ta bobedat.

²³Kurason di un hende sabi ta guia su boka, i su lepnan ta papia ku konosementu.

²⁴Palabranan agradabel ta manera un panal di miel, dushi pa alma i kuramentu pa wesu.

²⁵Tin un kaminda ku ta parse bon den bista di hende, ma su fin ta e kaminda di morto.

²⁶Apetit di un trahado ta traha p'e, pasobra su boka ta obligu'e.

²⁷Un hende perverso ta koba saka maldat, i su palabranan ta manera un kandela tur na flam.

²⁸Un hende perverso ta sembra pleitu, i un hasido di redu ta separa amigunan intimo.

²⁹Un hende violento ta tenta su prohimo, i ta hib'e den un kaminda ku no ta bon.

³⁰Esun ku kinipi ku su wowo ta hasi asina pa plania kosnan perverso; esun ku primi su lepnan riba otro tin mal intenshon.

³¹Kabei blanku ta un korona di gloria; den e kaminda di hustisia e ta wordu hana.

³²Esun ku no ta rabia lihe ta miho ku e poderoso, i esun ku ta goberna su spiritu ta miho ku esun ku ta kaptura un stat.

³³Lot ta wordu tira den skochi, ma SENOR ta Esun ku ta disidi tur kos.