Read Papantla Totonac Proverbionan 17 Bible Online

Proverbionan 17 - Papantla Totonac bible

Proverbionan 17

¹Miho un pida pan seku, ku trankilidat, ku un kas yen di ko'i kome, ku pleitamentu.

²Un sirbido sabi lo goberna riba un yu ku ta kousa berguensa, i e lo tin parti den e erensia huntu ku e rumannan.

³Wea pa dirti metal ta pa plata, i fornu ta pa oro, ma ta SENOR ta sonda kurason.

⁴Un malbado ta skucha na lepnan enganoso; i un ganado ta paga atenshon na lenga malisioso.

⁵Esun ku hasi bofon di e hende pober ta insulta Esun ku a trah'e; i esun ku gosa di mira kalamidat lo no keda sin kastigu.

⁶Nietu ta korona di hende bieu, i gloria di e yunan ta nan mayornan.

⁷Palabranan elokuente no ta pas den boka di un hende bobo, muchu menos lepnan mentiroso ta pas pa un prens.

⁸Plaka pasa bou di mesa ta manera un talisman den bista di su dono; unda ku e bira, e ta prospera.

⁹Esun ku tapa un transgreshon ta buska amor, ma esun ku ripiti un asunto ta separa amigunan intimo.

¹⁰Un reprendementu ta drenta mas profundo den un hende ku tin komprendementu, ku shen sla den un bobo.

¹¹Un hende rebelde ta buska solamente maldat, pesei un mensahero kruel lo wordu manda kontra dje.

¹²Miho enfrenta un ber ku nan a horta su yunan for di dje, ku enfrenta un bobo den su bobedat.

¹³Esun ku paga bon ku malu, maldat lo no bai for di su kas nunka.

¹⁴E kuminsamentu di pleitu ta manera ora dam kibra; pesei, laga e asunto para, prome ku e rementa.

¹⁵Esun ku hustifika e malbado, i esun ku kondena e hustu, tur dos ta abominashon pa SENOR.

¹⁶Ki bal plaka den man di un bobo pa kumpra sabiduria, siendo ku e no tin deseo pa hana esei?

¹⁷Un amigu ta stima tur ora bai, i un ruman ta nasi pa tempu di atversidat.

¹⁸Un hende ku falta komprendementu ta sera kombenio, i ta para borg den presensia di su prohimo.

¹⁹Esun ku stima transgreshon ta stima pleitu, i esun ku traha un porta haltu ta buska destrukshon.

²⁰Un hende ku kurason enganoso nunka ta hana bondat, i esun ku lenga perverso ta kai den maldat.

²¹Esun ku engendra un bobo ta engendr'e pa su mes tristesa, i tata di un bobo no tin goso.

²²Un kurason kontentu ta un bon remedi, ma un spiritu abati ta seka wesu.

²³Un malbado ta asepta plaka pasa bou di mesa, pa trose e kaminda di hustisia.

²⁴Sabiduria ta dilanti di esun ku tin komprendementu, ma wowo di un bobo ta dwal te na e finnan di tera.

²⁵Un yu bobo ta tristesa pa su tata, i amargura pa esun ku a pon'e na mundu.

²⁶Tampoko no ta bon pa kastiga e hustu, ni pa suta e nobelnan pa nan rektitut.

²⁷Esun ku midi su palabranan tin konosementu, i esun ku tin un spiritu kalmo ta un hende di komprendementu.

²⁸Asta un bobo ta pasa pa sabi, ora ku e keda ketu; ora ku e sera su boka, e ta pasa pa un hende prudente.