Read Papantla Totonac Proverbionan 18 Bible Online

Proverbionan 18 - Papantla Totonac bible

Proverbionan 18

¹Esun ku isola su mes ta buska su mes deseo; su furia ta lanta kontra tur sabiduria sano.

²Un bobo no tin delisia den komprendementu, ma solamente den ekspreshon di su mes opinion.

³Ora ku un malbado bin, despresio tambe ta bin, i huntu ku desonor ta bin reproche.

⁴E palabranan di boka di un hende ta awa hundu, i e fuente di sabiduria ta un roi ku ta brota.

⁵No ta bon pa duna un malbado preferensia, ni pa laga un hustu kai na ora di huisio.

⁶E lepnan di un bobo ta trese pleitu, i su boka ta pidi sla.

⁷E boka di un bobo ta su ruina, i su lepnan ta un trampa pa su alma.

⁸E palabranan di un hasido di redu ta manera kuminda di boka dushi, i nan ta baha bai te den e partinan di mas paden di hende.

⁹Tambe esun ku ta floho den su trabou ta ruman di esun ku ta destrui.

¹⁰E nomber di SENOR ta un toren fuerte; e hustu ta kore drenta den dje i ta sigur.

¹¹E rikesa di un hende riku ta su stat fortifika, i manera muraya haltu den su mes imaginashon.

¹²Prome ku su kaida kurason di un hende ta halsa su mes, ma umildat ta bin prome ku onor.

¹³Esun ku rosponde prome ku e skucha, esei ta bobedat i berguensa p'e.

¹⁴E spiritu di un hende ta sosten'e den su malesa, ma ken por soporta un spiritu abati?

¹⁵Kurason di e hende prudente ta atkiri konosementu, i orea di e hende sabi ta buska konosementu.

¹⁶Regalo di un hende ta habri kaminda p'e, i ta hib'e dilanti di hombernan grandi.

¹⁷Esun ku ta prome pa pleita su kaso ta parse hustu, te ora ku un otro bin interogu'e.

¹⁸Tiramentu di lot ta pone fin na pleitu, i ta tene e poderosonan separa for di otro.

¹⁹Un ruman ofendi ta mas difisil pa gana ku un stat fortifika, i pleitu ta manera baranan di un kastel.

²⁰Barika di un hende lo keda satisfecho ku e fruta di su boka; e lo keda satisfecho ku e produkto di su lepnan.

²¹Morto i bida ta den e poder di lenga, i esnan ku stima esaki lo kome su fruta.

²²Esun ku hana un esposa ta hana algu bon, i ta risibi fabor for di SENOR.

²³E pober ta papia ku rogamentu, ma e riku ta rosponde brutu.

²⁴Un hende ku tin hopi amigu por yega na ruina, ma tin un amigu ku ta mas pega ku un ruman.