Read Papantla Totonac Proverbionan 2 Bible Online

Proverbionan 2 - Papantla Totonac bible

Proverbionan 2

¹Mi yu, si bo kier risibi mi palabranan i warda mi mandamentunan den bo,

²hasi bo orea atento na sabiduria, i inklina bo kurason na komprendementu;

³pasobra si bo sklama pa disernimentu, halsa bo bos pa komprendementu,

⁴si bo busk'e manera plata, i rondi'e manera tesoro skondi,

⁵e ora ei lo bo diserni e temor di SENOR, i deskubri e konosementu di Dios.

⁶Pasobra SENOR ta duna sabiduria; for di Su boka ta sali konosementu i komprendementu.

⁷E ta warda sabiduria sano pa esnan ku ta rekto; E ta un eskudo pa esnan ku ta kana den integridat;

⁸E ta warda e berehanan di hustisia, i ta preserva e kaminda di Su santunan.

⁹E ora ei lo bo diserni hustisia i huisio, i rektitut, si, tur bon kaminda.

¹⁰Pasobra sabiduria lo bin den bo kurason, i konosementu lo ta agradabel na bo alma.

¹¹Diskreshon lo wardabo; komprendementu lo kuidabo.

¹²Sabiduria lo librabo for di e kaminda di maldat, for di e hende ku ta papia kosnan perverso,

¹³for di esnan ku ta bandona e berehanan di rektitut, pa kana den e kamindanan di skuridat;

¹⁴kendenan tin delisia den hasimentu di maldat, i ta regosiha den e perversidat di maldat,

¹⁵kende nan berehanan ta trosi, i kendenan ta sigui nan kamindanan trosi.

¹⁶E lo librabo tambe for di e muhe strano, for di e adultera ku ta labia ku su palabranan,

¹⁷ku ta bandona e kompanero di su hubentut, i ta lubida e aliansa di su Dios;

¹⁸pasobra su kas ta senk bai abou te na morto, i su lastronan ta hiba te na e mortonan;

¹⁹ni un hende ku bai serka dje no ta bolbe bek, ni nan no ta alkansa e berehanan di bida.

²⁰Asina lo bo kana den e kaminda di bon hende, i permanese riba e berehanan di e hustunan.

²¹Pasobra e rektonan lo biba den e tera, i e perfektonan lo keda den dje;

²²ma e malbadonan lo wordu korta kita for di tera, i e traidonan lo wordu ranka for di dje ku rais ku tur.