Read Papantla Totonac Proverbionan 21 Bible Online

Proverbionan 21 - Papantla Totonac bible

Proverbionan 21

¹Manera riunan di awa, asina kurason di rei ta den e man di SENOR; E ta bir'e pa unda ku E kier.

²Tur kaminda di hende ta rekto den su mes bista, ma SENOR ta pisa kurason.

³Hasi hustisia i huisio ta mas aseptabel pa SENOR ku sakrifisio.

⁴Un mirada orguyoso, un kurason halsa, i e lampi di e malbado ta pika.

⁵E plannan di hende balente siguramente ta kondusi na abundansia, ma tur esnan ku tin pura, siguramente ta resulta den pobresa.

⁶Un tesoro hana pa medio di un lenga enganoso ta damp ku ta pasa lihe, un trampa mortal.

⁷Violensia di e malbado lo lastr'e bai kune, pasobra e ta nenga di hasi huisio.

⁸E kaminda di un hende kulpabel ta trosp ma pa loke ta e hende puru, su kondukta ta rekto.

⁹Miho biba den un skina riba dak, ku biba den un kas huntu ku un muhe pleitado.

¹⁰Alma di e malbado ta desea maldat; su prohimo no ta hana grasia den su bista.

¹¹Ora ku e hasido di bofon wordu kastiga, e simpel ta bira sabi, ma ora ku e sabi wordu instrui, e ta hana konosementu.

¹²E hustu ta opserva kas di e malbado, e ta entrega e malbadonan na ruina.

¹³Esun ku sera su orea pa sklamashon di e pober, e tambe lo sklama, ma lo no wordu kontesta.

¹⁴Un regalo na sekreto ta kalma rabia, i plaka pasa bou di mesa ta kalma furia pisa.

¹⁵Pa ehekuta hustisia ta goso pa e hustu, ma ta teror pa e hasidonan di inikidat.

¹⁶Un hende ku dwal kita for di e kaminda di komprendementu lo reposa den e asamblea di e mortonan.

¹⁷Esun ku gusta plaser lo bira un hende pober; esun ku gusta bina i zeta lo no bira riku.

¹⁸E malbado ta preis di reskate pa e hustu, i e infiel pa e rekto.

¹⁹Miho biba den desierto, ku biba huntu ku un muhe pleitado i rabiado.

²⁰Tin tesoro presioso i zeta den kas di e sabi, ma un hende bobo ta drispidi tur loke e tin.

²¹Esun ku aspira na hustisia i lealtat ta hana bida, hustisia i onor.

²²Un hende sabi ta subi muraya di stat di e poderoso, i ta bash'abou e fortalesa den kual nan ta konfia.

²³Esun ku warda su boka i su lenga ta warda su alma di angustia.

²⁴Un hende orguyoso i arogante-- "Hasido di bofon" ta su nomber; e ta aktua ku orguyo insolente.

²⁵Deseo di e floho ta mat'e, pasobra su mannan ta nenga di traha.

²⁶E ta pasa henter dia ta kudisha, mientras ku e hustu ta duna sin tene nada atras.

²⁷Sakrifisio di e malbado ta un abominashon, kuantu mas ora ku e tres'e ku mal intenshon.

²⁸Un testigu falsu lo perese, ma palabra di un hende obedesido lo permanese.

²⁹Un hende malbado ta sera su kara, ma e hende rekto ta stablese su kaminda.

³⁰No tin sabiduria, ni komprendementu, ni konseho kontra SENOR.

³¹E kabai ta wordu prepara pa e dia di bataya, ma viktoria ta pertenese na SENOR.