Read Papantla Totonac Proverbionan 23 Bible Online

Proverbionan 23 - Papantla Totonac bible

Proverbionan 23

¹Ora bo sinta pa kome ku un gobernante, paga bon atenshon na loke tin bo dilanti,

²i pone kuchu na bo garganta, si bo ta un hende golos.

³No desea su delikatesanan, pasobra esaki ta kuminda enganoso.

⁴No kansa bo kurpa pa rikesa; stop di preokupa pa esei.

⁵Ora bo pone bo bista riba dje, e no t'ei mas. Pasobra rikesa siguramente ta kria hala pa su mes, manera un aguila ku ta bula bai laira.

⁶No kome pan di hende pichiri, ni desea su delikatesanan;

⁷pasobra manera e ta pensa den su kurason, asina e ta. E ta bisabo: "Kome i bebe!" ma su kurason no ta ku bo.

⁸Lo bo saka bek e boka di kuminda ku bo a kome, i bo palabranan karinoso lo ta pornada.

⁹No papia den presensia di un bobo, pasobra e lo despresia e sabiduria di bo palabranan.

¹⁰No kita marka di e frontera antiguo, ni drenta kunuku di e werfanonan.

¹¹Pasobra nan Redentor ta poderoso; E lo pleita nan kaso kontra bo.

¹²Dirigi bo kurason na instrukshon, i bo oreanan na palabranan di konosementu.

¹³No keda sin duna un mucha disiplina; maske bo sut'e ku bara, e lo no muri.

¹⁴Sut'e ku bara, i libra su alma for di Seol.

¹⁵Mi yu, si bo kurason ta sabi, e ora ei mi kurason tambe lo keda kontentu.

¹⁶Si, mi alma lo regosiha, ora bo lepnan papia loke ta korekto.

¹⁷No laga bo kurason envidia pekado, ma biba semper den e temor di SENOR.

¹⁸Siguramente tin un futuro, i bo speransa lo no wordu korta kita afo.

¹⁹Skucha, mi yu, i sea sabi, i dirigi bo kurason riba e kaminda.

²⁰No anda ku esnan ku ta gusta dal nan bina, ni ku esnan ku ta golos pa kome karni.

²¹Pasobra e burache i e hende golos lo bira pober, i kabishamentu lo hasi un hende bisti pana kibra.

²²Skucha na bo tata ku a engendrabo, i no despresia bo mama ora ku e bira bieu.

²³Kumpra berdat, i no bend'e, tambe sabiduria, instrukshon i komprendementu.

²⁴Tata di e hustu lo tin gran goso, i esun ku engendra un yu sabi lo tin delisia den dje.

²⁵Laga bo tata i bo mama ta kontentu, i laga esun ku a hanabo regosiha.

²⁶Mi yu, dunami bo kurason, i laga bo wowo tin delisia den mi kamindanan.

²⁷Pasobra un prostituta ta un buraku hundu, i un adultera ta un pos smal.

²⁸Si, e ta skonde lur manera ladron, i ta oumenta e infielnan entre hombernan.

²⁹Ken tin ai? Ken tin ferdrit? Ken tin pleitu? Ken tin keho? Ken tin herida sin kousa? Ken tin wowo kora?

³⁰Esnan ku ta sinta oranan largu ku bina, esnan ku ta bai pa purba bina meskla.

³¹No wak bina ora ku e ta kora, ora ku e ta briya den kopa, ora ku e ta baha suave asina;

³²na final e ta morde manera kolebra, i ta pika manera vibora.

³³Bo wowonan lo mira kosnan strano, i bo kurason lo ekspresa kosnan perverso.

³⁴Lo bo ta manera un hende drumi meimei di laman, of manera un hende drumi riba top di un master.

³⁵Lo bo bisa: "Nan a dal mi, ma mi no a sinti! Nan a batimi, ma mi no tabata sa mes! Ki ora lo mi spierta? E ora ei mi ta bolbe buska mas."