Read Papantla Totonac Proverbionan 24 Bible Online

Proverbionan 24 - Papantla Totonac bible

Proverbionan 24

¹No sea envidioso di hende malbado, ni desea di ta huntu ku nan;

²pasobra nan kurason ta plania violensia, i nan lepnan ta papia di kalamidat.

³Ku sabiduria un kas ta wordu traha, i ku komprendementu e ta wordu stablesi.

⁴I ku konosementu e kambernan ta wordu yena ku tur rikesa presioso i agradabel.

⁵Un homber sabi ta fuerte, i un homber di konosementu ta oumenta poder.

⁶Pa medio di konseho sabi bo ta hasi guera, i den un multitut di konseheronan tin viktoria.

⁷Sabiduria ta for di alkanse di un bobo; e no ta habri su boka na e porta di stat.

⁸Esun ku plania maldat, hende lo yam'e un trahado di komplot.

⁹Plania lokura ta pika, i e hasido di bofon ta un abominashon pa hende.

¹⁰Si bo desmaya den e dia di angustia, bo forsa ta keda limita.

¹¹Libra esnan ku ta wordu hiba na morto, i salba esnan ku ta kore peliger di wordu mata.

¹²Si bo bisa: "Mira, nos no tabata sa esaki," esun ku ta pisa kurason no ta ripara esei? Esun ku ta warda bo alma no sa esei? I E lo no paga hende segun nan obranan?

¹³Mi yu, kome miel, pasobra esei ta bon, si, miel for di panal ta smak dushi den bo boka;

¹⁴sabi ku asina sabiduria ta pa bo alma; si bo han'e, e ora ei lo tin futuro, i bo speransa lo no wordu korta kita afo.

¹⁵O homber malbado, no skonde lur kas di e hustu; no destrui su luga di biba;

¹⁶pasobra un hende hustu ta kai shete bes, i ta lanta atrobe, ma e malbadonan ta trompeka den tempu di kalamidat.

¹⁷No gosa ora bo enemigu kai, i no laga bo kurason ta kontentu ora ku e trompeka,

¹⁸pa SENOR no mira esaki i keda malkontentu, i E kita Su rabia for di riba dje.

¹⁹No kunsumi pa kousa di hasidonan di maldat, ni sea envidioso di e malbadonan;

²⁰pasobra lo no tin futuro pa e hende malbado; lampi di e malbadonan lo wordu paga.

²¹Mi yu, teme SENOR i rei; no asosia ku esnan rebelde;

²²pasobra direpiente nan kalamidat lo lanta, i ken sa ki ruina e dosnan ei por trese?

²³Esakinan tambe ta dichonan di hende sabi. Pa tin distinshon di persona den hasimentu di huisio no ta bon.

²⁴Esun ku bisa e malbado: "Bo ta hustu," pueblonan lo maldishon'e, nashonnan lo abores'e.

²⁵Ma lo bai bon ku esnan ku reprende e malbado, i un bon bendishon lo bin riba nan.

²⁶Un kontesta korekto ta manera sunchi riba lep.

²⁷Prepara bo trabou pafo, pone tur kos kla pa bo mes den kunuku; i despues traha bo kas.

²⁸No para testigu kontra bo prohimo sin motibu, i no gana ku bo lepnan.

²⁹No bisa: "Lo mi hasi kune meskos ku el a hasi ku mi; lo mi paga e homber segun su obra."

³⁰Mi a pasa banda di kunuku di un floho, banda di hofi di wendruif di un hende ku falta komprendementu.

³¹I mira, tabatin kadushi ta krese tur kaminda; e superfisio tabata yen-yen di bringamosa. I su transhi a keda basha abou.

³²Ora mi a mira esaki, mi a reflekshona riba dje; mi a opserva i a risibi instrukshon.

³³"Drumi poko mas, kabisha poko mas, drumi poko mas ku man krusa,"

³⁴asina bo pobresa lo bin manera un ladron, i bo nesesidat manera un homber arma.