Read Papantla Totonac Proverbionan 25 Bible Online

Proverbionan 25 - Papantla Totonac bible

Proverbionan 25

¹Esakinan tambe ta proverbionan di Salomon, ku e hendenan di Ezekias, rei di Juda, a kopia.

²Ta e gloria di Dios pa skonde un asunto, ma e gloria di reinan ta pa skudrina un asunto.

³Meskos ku e shelunan ta haltu, i tera ta profundo, asina e kurason di reinan ta inskudrinabel.

⁴Kita e skuma for di e plata, anto lo sali un artikulo-di-uzo pa e plate.

⁵Kita e malbado for di e presensia di rei, i su trono lo wordu stablesi den hustisia.

⁶No halsa bo mes den e presensia di rei, i no para den e luga di e grandinan.

⁷Pasobra ta miho pa nan bisabo: "Subi bin aki riba," ku pa nan umiyabo den presensia di prens, kende bo wowo a mira.

⁸No sea pura pa pleita bo kaso; pasobra kiko lo bo hasi na final, ora bo prohimo ponebo na berguensa?

⁹Pleita bo kaso ku bo prohimo, i no revela sekreto di un otro,

¹⁰pa esun ku tende esaki no ponebo na berguensa, i bo reputashon keda ruina.

¹¹Un palabra papia na ora apropia ta manera un apel di oro den montura di plata.

¹²Manera un rench'i orea di oro i un adorno di oro fni, asina ta un reprendedo sabi pa un orea ku ta skucha.

¹³Manera friu di sneu den tempu di kosecha, asina ta un mensahero fiel pa esnan ku ta mand'e, pasobra e ta refreska alma di su shonnan.

¹⁴Manera nubia i bientu sin awaseru, asina ta un hende ku ta gaba regalo ku e no a duna.

¹⁵Ku hopi pasenshi un gobernante por wordu persuadi, i un lenga suave ta kibra wesu.

¹⁶Bo a hana miel? Kome solamente loke bo mester, pa bo no yena di mas i sak'e bek.

¹⁷No pone pia den kas di bo prohimo ku muchu frekuensia, pa e no fada di bo i odiabo.

¹⁸Manera un klop, un spada i un flecha skerpi, asina ta un hende ku ta duna testimonio falsu kontra su prohimo.

¹⁹Konfiansa den un hende infiel den tempu di angustia ta manera un djente putri i un pia saka for di luga.

²⁰Manera un hende ku ta kita su pana riba un dia ku ta hasi friu, i manera binager riba soda, ta esun ku ta kanta kantika pa un kurason tristu.

²¹Si bo enemigu tin hamber, dun'e pan pa kome, i si e tin set, dun'e awa pa bebe;

²²pasobra asina lo bo montona karbon sendi riba su kabes, i SENOR lo rekompensabo.

²³Bientu di nort ta trese awaseru, i lenga ku ta kalumnia ta trese kara rabia.

²⁴Miho biba den un skina riba dak, ku biba den un kas huntu ku un muhe pleitado.

²⁵Manera awa friu pa un alma ku tin set, asina ta bon notisia for di un tera leu.

²⁶Manera un fuente trubla i un pos kontamina, asina ta un hende hustu ku ta kai dilanti di e malbado.

²⁷No ta bon pa kome hopi miel; tampoko no ta onorabel pa buska bo mes onor.

²⁸Esun ku no tin dominio riba su spiritu ta manera un stat basha abou, sin muraya.