Read Papantla Totonac Proverbionan 26 Bible Online

Proverbionan 26 - Papantla Totonac bible

Proverbionan 26

¹Meskos ku sneu no ta pas pa zomer i awaseru no ta pas pa tempu di kosecha, asina onor no ta pas pa un bobo.

²Manera un mofi ta zwef, manera zwarchi ta bula ront, asina un maldishon sin motibu no ta alkansa su meta.

³Un zwip ta pa kabai, un bosal pa buriku, i un bara pa lomba di hende bobo.

⁴No kontesta un bobo segun su bobedat, pa bo tambe no bira meskos kune.

⁵Kontesta un bobo manera su bobedat ta merese, pa e no kere su mes sabi.

⁶Esun ku manda un mensahe pa medio di un bobo ta korta su mes pia afo i ta bebe violensia.

⁷Manera pia di un hende lam ta kologa slap, asina ta un proverbio den boka di bobonan.

⁸Manera un ku ta mara piedra den un slenger, asina ta esun ku ta duna onor na un bobo.

⁹Manera un sumpina den man di un burache, asina ta un proverbio den boka di bobonan.

¹⁰Manera un tirado di flecha ku ta herida tur hende, asina ta esun ku ta kontrata un bobo of kualkier hende ku ta pasa.

¹¹Manera un kacho ta bolbe na loke ku el a saka, asina un bobo ta ripiti su bobedat.

¹²Bo ta mira un hende ku ta kere su mes sabi? Tin mas speransa pa un bobo ku pa e hende ei.

¹³E floho ta bisa: "Tin un leon riba kaminda! Tin un leon den kaya!"

¹⁴Manera porta ta drai riba su skarnirnan, asina e floho ta drai riba su kama.

¹⁵Un floho ta hinka su man den tayo, ma ta muchu kansansio p'e pa hib'e bek na su boka.

¹⁶E floho ta kere su mes mas sabi ku shete hende ku por kontesta ku prudensia.

¹⁷Esun ku pasa entremete su mes den pleitu di otro ta manera un hende ku ta kohe un kacho na su orea.

¹⁸Manera un hende loko ku ta tira flambeu, flecha i morto,

¹⁹asina ta e hende ku ta gana su prohimo, i ta bisa: "Ai ta chansa mi ta chansa!"

²⁰Pa falta di palu, kandela ta paga, i kaminda no tin hasido di redu, pleitu ta stop.

²¹Manera karbon ta pa karbon send!, i palu pa kandela, asina un hende pleitado ta pa forma pleitu.

²²E palabranan di un hasido di redu ta manera kuminda di boka dushi, i nan ta baha bai den e partinan di mas paden di hende.

²³Manera un artikulo di klei, pasa den skuma di plata, asina ta lepnan ferviente i un mal kurason.

²⁴Esun ku ta odia ta disimula esei ku su lepnan, ma den su kurason e ta montona engano.

²⁵Ora ku e papia karinoso asina, no ker'e, pasobra tin shete abominashon den su kurason.

²⁶Maske su odio ta purba di tapa su mes ku engano, su maldat lo wordu revela dilanti di e asamblea.

²⁷Esun ku koba un pos lo kai aden, i esun ku bolter un piedra, e piedra lo lora bin bek riba dje.

²⁸Un lenga mentiroso ta odia esnan ku e ta lastima, i un boka ku ta labia ta obra ruina.