Read Papantla Totonac Proverbionan 29 Bible Online

Proverbionan 29 - Papantla Totonac bible

Proverbionan 29

¹Esun ku wordu reprendi hopi biaha i tog ta hasi su nek steif, lo wordu kibra direpiente, sin remedi.

²Ora ku e hustunan oumenta, pueblo ta regosiha, ma ora ku un malbado ta goberna, pueblo ta suspira.

³Esun ku stima sabiduria ta hasi su tata kontentu, ma esun ku anda ku prostituta ta malgasta su rikesa.

⁴Pa medio di huisio rei ta stablese e tera, ma un hende ku tuma plaka pasa bou di mesa ta destruie.

⁵Un hende ku ta labia su prohimo ta span un net pa su pianan.

⁶Un malbado ta kai den trampa di su mes transgreshon, ma e hustu ta kanta i ta regosiha.

⁷E hustu ta konsidera derecho di e pobernan, ma e malbado no ta komprende un kos asina.

⁸Hasidonan di bofon ta pega un stat na kandela, ma hende sabi ta kalma rabia.

⁹Ora ku un hende sabi tin un diskushon ku un hende bobo, e bobo ta bira razu of e ta hari; i no tin pas.

¹⁰Hombernan dramado di sanger ta odia esun ku ta perfekto, ma e hustunan ta buska su bienestar.

¹¹Un bobo ta duna rienda suelta na su rabia, ma un sabi ta wanta esaki aden.

¹²Si un gobernante paga atenshon na mentira, tur su sirbidonan ta bira malbado.

¹³E hende pober i e opresor tin esaki den komun: SENOR ta ilumina wowo di tur dos.

¹⁴Si un rei huzga e pobernan segun berdat, su trono lo ta stablesi pa semper.

¹⁵Bara i reprendementu ta duna sabiduria, ma un yu laga pa su kuenta ta pone su mama na berguensa.

¹⁶Ora ku e malbadonan oumenta, transgreshon ta oumenta, ma e hustunan lo mira nan kaida.

¹⁷Koregi bo yu, i e lo dunabo trankilidat; si, e lo hasi bo alma kontentu.

¹⁸Kaminda no tin vishon e pueblo ta laga tur frena bai, ma felis ta esun ku ta warda lei.

¹⁹Un esklabu lo no wordu koregi ku palabra so, pasobra maske e ta komprende, e lo no kontesta.

²⁰Bo ta mira un hende ku ta muchu lihe ku su palabranan? Tin mas speransa pa un bobo ku p'e.

²¹Esun ku mima su esklabu for di chikitu, na final e lo tin e komo yu.

²²Un hende rabia ta lanta pleitu, i un hende furioso ta hasi hopi transgreshon.

²³Orguyo di un hende lo rebah'e, ma esun ku ta di spiritu umilde lo risibi onor.

²⁴Esun ku ta komplise di un ladron ta su mes enemigu; e ta han'e obliga di hura, ma no ta tribi bisa nada.

²⁵Temor pa hende ta pone un trampa, ma esun ku konfia den SENOR lo ta halsa.

²⁶Hopi ta buska fabor di un gobernante, ma ta for di SENOR hende ta hana hustisia.

²⁷Un hende inhustu ta un abominashon pa e hustunan, i esun ku ta kana den rektitut ta un abominashon pa e malbado.