Read Papantla Totonac Proverbionan 3 Bible Online

Proverbionan 3 - Papantla Totonac bible

Proverbionan 3

¹Mi yu, no lubida mi sinansa, ma laga bo kurason warda mi mandamentunan,

²pasobra dianan largu, bida largu i pas nan lo agrega na bo.

³No laga miserikordia i berdat bandonabo; mara nan ront di bo garganta, skirbi nan riba tabla di bo kurason.

⁴Asina lo bo hana grasia i aprobashon den bista di Dios i hende.

⁵Konfia den SENOR ku henter bo kurason, i no depende riba bo mes komprendementu.

⁶Den tur bo kamindanan rekonos'E, i E lo dirigi bo berehanan.

⁷No sea sabi den bo mes bista; teme SENOR, i aparta bo mes for di maldat.

⁸Esaki lo ta kuramentu pa bo kurpa, i tuti pa bo wesunan.

⁹Onra SENOR ku bo rikesa, i ku e prome fruta di tur bo produktonan;

¹⁰asina bo mangasinanan lo wordu yena ku abundansia, i bo bakinan-di-pers-wendruif lo basha ofer di bina

¹¹Mi yu, no rechasa e disiplina di SENOR, ni aborese Su reprendementu,

¹²pasobra esun ku SENOR ta stima, E ta reprende, meskos ku un tata ta reprende e yu ku e tin delisia den dje.

¹³Bendishona ta e hende ku hana sabiduria, e hende ku hana komprendementu,

¹⁴pasobra probecho di esaki ta miho ku probecho di plata, i su ganashi mas ku oro fini.

¹⁵E ta mas presioso ku rubi, i tur loke bo por desea no ta di kompara kune.

¹⁶Bida largu ta den su man drechi, i rikesa i onor ta den su man robes.

¹⁷Su kamindanan ta kamindanan agradabel, i tur su berehanan ta pas.

¹⁸E ta un palu di bida pa esnan ku ta gar'e tene, i felis ta tur esnan ku tene duru na dje.

¹⁹Pa medio di sabiduria SENOR a funda tera; pa medio di komprendementu El a stablese e shelunan.

²⁰Pa medio di Su konosementu e profundidatnan a wordu kibra, i e nubianan ta gotia serena.

²¹Mi yu, no laga esakinan kita for di bo bista; retene sabiduria sano i diskreshon,

²²asina nan lo ta bida pa bo alma i adorno na bo garganta.

²³E ora ei lo bo kana den bo kaminda ku tur konfiansa, i bo pia lo no trompeka.

²⁴Ora bo kai drumi, lo bo no tin miedu; ora bo kai drumi, bo sono lo ta dushi.

²⁵No tene miedu di desaster inespera, ni di atake di malbadonan ora ku esaki bin;

²⁶pasobra SENOR lo ta bo konfiansa, i lo warda bo pia di wordu kohl den trampa.

²⁷No laga di hasi bon na esnan ku merese esaki, si ta den bo poder pa hasie.

²⁸No bisa bo prohimo: "Bai bolbe, i manan lo mi dunabo," mientras ku bo tin e ku bo.

²⁹No plania maldat kontra bo prohimo, mientras ku e ta biba konfiadamente band'i bo.

³⁰No pleita ku un hende sin motibu, si e no a hasibo ningun dano.

³¹No envidia un hende di violensia, i no skohe ningun di su kamindanan.

³²Pasobra e hende perverso ta un abominashon pa SENOR, ma E tin komunion intimo ku e hende rekto.

³³Maldishon di SENOR ta riba e kas di e malbado, ma E ta bendishona e luga di biba di e hustu.

³⁴E ta hasi bofon di e bofonadonan, ma E ta duna grasia na e umildenan.

³⁵E sabinan lo ereda onor, ma bobonan ta montona berguensa riba nan mes.