Read Papantla Totonac Proverbionan 30 Bible Online

Proverbionan 30 - Papantla Totonac bible

Proverbionan 30

¹E palabranan di Agur, yu homber di Jake--e profesia. E homber a bisa Itiel, esta, Itiel i Ukal:

²Siguramente mi ta mas bobo ku kualkier hende, i mi no tin e komprendementu di hende.

³Tampoko mi no a sina sabiduria, ni mi no tin konosementu di Esun Santu.

⁴Ken a subi na shelu i a bolbe baha? Ken a rekohe bientu den Su moketa? Ken a lora e awanan den Su bisti? Ken a stablese tur e finnan di tera? Kon ta Su nomber i nomber di Su Yu? Siguramente bo sa!

⁵Tur palabra di Dios ta puru; e ta un eskudo pa esnan ku ta tuma refugio den djé.

⁶No anadi na Su palabranan, pa E no reprendebo i bo wordu proba di ta un ganado.

⁷Dos kos mi ta pidiBo, no nengami nan prome ku mi muri:

⁸Tene falsedat i mentira leu for di mi, no dunami ni pobresa ni rikesa-- dunami solamente mi pan di kada dia,

⁹pa mi no tin di mas i nengaBo, i bisa: "Ken ta SENOR?" Of pa mi no ta den nesesidat i horta, i profana e nomber di mi Dios.

¹⁰No kalumnia un esklabu serka su shon, pa e no maldishonabo i bo wordu hana kulpabel.

¹¹Tin un generashon ku ta maldishona su tata, i no ta bendishona su mama.

¹²Tin un generashon ku ta puru den su mes bista, i tog no ta laba di su sushedat.

¹³Tin un generashon--esta orguyoso su wowonan ta! E ta wak ku menospresio.

¹⁴Tin un generashon ku su djentenan ta manera spada, i su kisnan manera kuchu, pa devora e afliginan for di riba tera, i esnan den nesesidat for di meimei di hende.

¹⁵E chupado di sanger tin dos yu muhe ku ta grita: "Duna! Duna!" Tin tres kos ku nunka ta keda sasia, si, kuater kos ku nunka ta bisa: "Ta basta":

¹⁶Seol, i e matris steril, tera ku nunka tin basta awa, i kandela ku nunka ta bisa: "Ta basta."

¹⁷E wowo ku ta hasi bofon di un tata, i ta despresia obedensia na un mama, e rafnan di vaye lo pik e sak'e afo, i e aguilanan chikitu lo kom'e.

¹⁸Tin tres kos ku ta muchu maraviyoso pa mi, si, kuater ku mi no ta komprende:

¹⁹e kaminda di un aguila den laira, e kaminda di un kolebra riba baranka, e kaminda di un bapor meimei di laman, i e kaminda di un homber pa ku un mucha muhe.

²⁰Esaki ta e kaminda di un adultera: e ta kome i ta limpia su boka, i ta bisa: "Mi no a hasi nada malu."

²¹Pa tres kos tera ta tembla, si, kuater e no por soporta:

²²un esklabu ora ku e bira rei, un loko barika yen,

²³un muhe despresia, ora ku e hana un esposo, i un kria ku tuma luga di su senora.

²⁴Tin kuater kos ku ta chikitu riba tera, ma nan ta sumamente sabi:

²⁵vruminga no ta un pueblo fuerte, tog nan ta prepara nan kuminda den zomer;

²⁶konenchi ta un pueblo swak, tog nan ta traha nan kasnan den baranka;

²⁷tirakochi no tin rei, tog nan tur ta sali huntu na ordu perfekto;

²⁸arana bo por gara ku man, tog e ta den palasionan di rei.

²⁹Tin tres kos ku ta kana mahestuosamente, si, kuater ku tin un kana mahestuoso:

³⁰e leon, ku ta esun di mas fuerte entre e bestianan, i ku no ta hal'atras pa nada;

³¹e gai, ku ta kana orguyosamente, tambe e kabritu chubatu, i un rei ora ku su ehersito ta huntu kune.

³²Si bo a komete e bobedat di halsa bo mes, of si bo a plania maldat, pone man na bo boka.

³³Pasobra meskos ku batimentu di lechi ta produsi manteka, i trosementu di nanishi ta produsi sanger, asina probokamentu di rabia ta produsi pleitu.