Read Papantla Totonac Proverbionan 31 Bible Online

Proverbionan 31 - Papantla Totonac bible

Proverbionan 31

¹Palabranan di rei Lemuel, e dichonan ku su mama a sin'e.

²Kiko, mi yu? I kiko, yu di mi mondongo? I kiko, yu di mi promesanan?

³No gasta bo forsa ku muhe, ni bo vigor ku esnan ku ta destrui reinan.

⁴No ta pas pa reinan, O Lemuel, no ta pas pa reinan bebe bina, ni pa gobernantenan desea bibida sterki,

⁵pa nan no bebe i lubida lei, i trose derecho di tur e afliginan.

⁶Duna bibida sterki na esun ku ta perese, i bina na esun ku su kurason ta amarga.

⁷Lagu'e bebe i lubida su pobresa, i no korda su miseria mas.

⁸Habri bo boka pa e mudo, pa derecho di tur esnan desafortuna.

⁹Habri bo boka, huzga ku hustisia, i defende derecho di e pober i di hende den nesesidat.

¹⁰Un muhe birtuoso, ken por han'e? Pasobra e bal muchu mas ku rubi.

¹¹Kurason di su esposo ta konfia den dje, i su esposo lo no tin falta di ganashi.

¹²E ta hasi bon na su esposo, i no malu, tur e dianan di su bida.

¹³E ta buska lana i lino, i ku gustu e ta traha ku su mannan.

¹⁴E ta manera barkunan di komersiante; e ta trese su kuminda for di leu.

¹⁵E ta lanta mientras ta nochi ainda, i ta duna kuminda na su famia, i tarea na su sirbientenan.

¹⁶E ta inspekta un tereno, i ta kumpr'e; for di su ganashi e ta planta un kunuku di wendruif.

¹⁷E ta faha su hep ku fortalesa, i ta fortalese su brasanan.

¹⁸E ta ripara ku su negoshi ta bai bon; anochi su lampi no ta paga.

¹⁹E ta tene e karete-pa-hila den su man, i su dedenan ta gara e spul.

²⁰E ta habri su man pa e pober, i ta ekstende su man na esun den nesesidat.

²¹E no tin miedu di sneu pa su famia, pasobra henter su famia ta bisti na skarlata.

²²E ta traha ko'i tapa pa pone riba su kama; su bisti ta di pana di lino fini i purpura.

²³Su esposo ta konosi den e portanan di stat, ora ku e sinta entre e ansianonan di e pais.

²⁴E ta traha pana-di-bisti di tela di lino, i ta bende nan, i ta entrega faha na e komersiantenan.

²⁵Fortalesa i dignidat ta su bisti, i ku alegria e ta spera e porvenir.

²⁶E ta habri su boka ku sabiduria, i sinansa karinoso ta riba su lenga.

²⁷E ta tene e kamindanan di su famia bon na bista, i no ta kome pan di flohedat.

²⁸Su yunan ta lanta i ta yam'e bendishona; su esposo tambe, i e ta gab'e, bisando:

²⁹"Tin hopi yu muhe ku a hasi bon, ma abo ta surpasa nan tur."

³⁰Ser atraktivo ta enganoso i bunitesa ta banidat, ma un muhe ku ta teme SENOR, esei lo wordu elogia.

³¹Dun'e di e fruta di su mannan, i laga su mes obranan gab'e den e portanan di stat.