Read Papantla Totonac Proverbionan 4 Bible Online

Proverbionan 4 - Papantla Totonac bible

Proverbionan 4

¹Mi yunan, tende instrukshon di un tata, i paga atenshon pa boso hana komprendementu;

²pasobra mi a duna boso sinansa sano; no bandona mi instrukshon.

³Tempu ku mi tabata un yu pa mi tata, delikado i e uniko yu homber den bista di mi mama,

⁴el a sinami i a bisami: "Laga bo kurason tene duru na mi palabranan; warda mi mandamentunan i biba.

⁵Atkiri sabiduria! Atkiri komprendementu! No lubida mi palabranan, ni desvia for di nan.

⁶No bandona sabiduria, i e lo wardabo; stim'e, i e lo kuidabo.

⁷E prinsipio di sabiduria ta: Atkiri sabiduria; i riba tur kos, atkiri komprendementu;

⁸hals'e, i e lo halsabo; e lo onrabo si bo bras'e.

⁹E lo pone un adorno di grasia riba bo kabes; e lo regalabo un korona di gloria."

¹⁰Tende, mi yu, i asepta mi palabranan, i e ananan di bo bida lo ta hopi.

¹¹Mi a dirigibo den e kaminda di sabiduria; mi a guiabo den e berehanan di rektitut.

¹²Ora bo kana, bo pasonan lo no wordu stroba; i si bo kore, lo bo no trompeka.

¹³Gara instrukshon; no lagu'e bai. Kuid'e, pasobra e ta bo bida.

¹⁴No pasa riba e bereha di e malbadonan, i no subi e kaminda di hombernan malbado.

¹⁵Evita esei, no pasa riba dje; hala leu for di dje i sigui bo kaminda.

¹⁶Pasobra nan no por drumi si nan no a hasi maldat; i nan sono ta wordu kita for di nan, ora ku nan no por hasi un hende trompeka.

¹⁷Pasobra nan ta kome e pan di maldat, i ta bebe e bina di violensia.

¹⁸Ma e bereha di e hustu ta manera lus di ourora, ku ta briya mas i mas te ora ku bira di dia kla.

¹⁹Kaminda di e malbado ta manera skuridat; nan no sa riba kiko nan ta trompeka.

²⁰Mi yu, paga atenshon na mi palabranan; inklina bo orea na loke mi ta bisa.

²¹No laga nan kita for di bo bista; warda nan den bo kurason.

²²Pasobra nan ta bida pa esnan ku hana nan, i salu pa henter nan kurpa.

²³Warda bo kurason riba tur kos, pasobra e ta e fuente di bida.

²⁴Kita for di bo un boka enganoso, i tene lepnan perverso leu for di bo.

²⁵Laga bo wowo wak regt bo dilanti; laga bo klep di wowo keda fiha stret bo dilanti.

²⁶Mira bon unda bo pianan ta hibabo, e ora ei tur bo kamindanan lo keda stablesi.

²⁷No bira ni na man drechi ni na man robes; tene bo pia leu for di maldat.