Read Papantla Totonac Proverbionan 6 Bible Online

Proverbionan 6 - Papantla Totonac bible

Proverbionan 6

¹Mi yu, si bo a para borg pa bo prohimo, si bo a para garantia pa un stranhero,

²bo a wordu kohl den trampa ku e palabranan di bo boka; bo a wordu kohl prezo ku e palabranan di bo boka.

³Hasi esaki anto, mi yu, i libra bo mes, ya ku bo a kai den man di bo prohimo: bai, umiya bo mes, i insisti serka bo prohimo.

⁴No laga sono domina bo wowo, ni madoho domina bo klep di wowo;

⁵libra bo mes manera un gasel for di man di yagdo, i manera un parha for di man di yagdo di parha.

⁶Bai wak vruminga, abo floho, opserva su maneranan, i sea sabi!

⁷E no tin hefe, ni kapitan, ni gobernante,

⁸tog e ta prepara su kuminda den zomer, i ta rekohe su provishonnan den tempu di kosecha.

⁹O floho, kuantu tempu mas bo kier keda drumi? Ki ora bo tin idea di lanta for di bo sono?

¹⁰"Lagami drumi poko mas, kabisha poko mas, lagami drumi poko mas ku man krusa"--

¹¹asina bo pobresa lo bin manera un bagamundo, i bo nesesidat manera un homber arma.

¹²Un hende ku no ta sirbi pa nada, un homber malbado, ta esun ku ta kana ront ku boka enganoso,

¹³ku ta kinipi wowo, ku ta hasi sena ku pia, ku ta mustra ku dede;

¹⁴kende, ku perversidat den su kurason, ta plania maldat kontinuamente, kende ta sembra desunion.

¹⁵Pesei su kalamidat lo bin direpiente; instantaneamente e lo wordu kibra, i lo no tin kuramentu.

¹⁶Tin seis kos ku SENOR ta odia, si, shete kos ku ta un abominashon p'E:

¹⁷wowonan altanero, un lenga mentiroso, i mannan ku ta drama sanger inosente,

¹⁸un kurason ku ta plania maldat, pianan ku ta lihe pa kore hasi maldat,

¹⁹un testigu falsu ku ta papia mentira, i esun ku ta sembra desunion entre rumannan.

²⁰Mi yu, warda e mandamentu di bo tata, i no bandona e sinansa di bo mama;

²¹mara nan kontinuamente riba bo kurason, mara nan ront di bo garganta.

²²Ora bo ta riba kaminda, nan lo guiabo; ora bo ta drumi, nan lo kuidabo; i ora bo lanta, nan lo papia ku bo.

²³Pasobra e mandamentu ta un lampi, i e sinansa ta lus; i e reprendementunan di disiplina ta e kaminda di bida,

²⁴pa wardabo for di e muhe malbado, for di e labiamentu di e adultera.

²⁵No desea su bunitesa den bo kurason, ni lagu'e garabo ku su klep di wowo.

²⁶Pasobra pa kousa di un prostituta un homber ta wordu rebaha te na un pida pan; i un adultera ta yag riba un bida presioso.

²⁷Un homber por tuma kandela den su bus sin kima su pana?

²⁸Of un homber por kana riba karbon kayente sin kima su pia?

²⁹Asina ta pasa ku esun ku drumi ku esposa di su prohimo; esun ku mishi kune no ta keda sin hana kastigu.

³⁰Hende no ta despresia un ladron si e horta pa yena su barika, ora ku e tin hamber;

³¹ma ora ku e wordu hana ta horta, e mester paga bek shete bes mas tantu; e mester duna tur loke tin den su kas.

³²Esun ku komete adulterio ku un muhe ta falta komprendementu; esun ku hasi esaki ta kaba ku su mes.

³³Herida i desonor e lo hana, i su reproche lo no wordu kita nunka.

³⁴Pasobra yalursheit ta lanta furia di un homber; e lo no tin miserikordia riba e dia di vengansa.

³⁵E lo no asepta ningun sorto di kompensashon, i lo no kalma, ni maske kuantu regalo bo dun'e.