Read Papantla Totonac Eccliastes 1 Bible Online

Eccliastes 1 - Papantla Totonac bible

Eccliastes 1

¹E palabranan di e Predikado, yu homber di David, rei di Jerusalem.

²"Banidat di banidatnan," e Predikado ta bisa, "Banidat di banidatnan! Tur ta banidat."

³Ki probecho hende tin di tur su trabou ku e ta hasi bou di solo?

⁴Un generashon ta bai i un generashon ta bin, ma tera ta permanese pa semper.

⁵Tambe solo ta sali i solo ta drenta, i ta pura bai bek na e luga for di unda e ta sali.

⁶Bientu ta supla bai suit i ta bira bai nort; bientu ta sigui bira kontinuamente, i siguiendo su kurso, e ta bolbe.

⁷Tur riu ta kore bai laman, tog laman no ta yena. Na e luga for di unda riunan ta bin, aya nan ta bolbe bai.

⁸Tur kos ta un kansansio, mas ku hende por ekspresa. Nunka wowo no ta keda sasia di mira, ni orea di tende.

⁹Loke tabata ta loke lo ta, i loke a wordu hasi ta loke lo wordu hasi. Asina no tin nada nobo bou di solo.

¹⁰Akaso tin algu ku hende por bisa di dje: "Mira esaki, e ta nobo"? Ya el a eksisti kaba pa siglonan ku tabata prome ku nos.

¹¹No tin rekuerdo di kosnan di antes, ni di kosnan ku lo sosode despues; lo no tin rekuerdo di nan serka esnan ku lo bin despues ainda.

¹²Ami, e Predikado, tabata rei di Israel na Jerusalem.

¹³I mi a pone mi kurason pa buska i investiga pa medio di sabiduria, tur loke a wordu hasi bou di shelu. Ta un tarea penoso ku Dios a duna e yunan di hende pa wordu afligi kune.

¹⁴Mi a mira tur e obranan ku a wordu hasi bou di solo, i ata, tur ta banidat i korementu tras di bientu.

¹⁵Loke ta trosi no por wordu hasi stret, i loke ta falta no por wordu konta.

¹⁶Mi a bisa mi mes: "Mira, mi a krese i a oumenta den sabiduria, mas ku tur ku a goberna Jerusalem prome ku mi; i mi kurason a eksperensia hopi sabiduria i konosementu."

¹⁷I mi a pone mi kurason pa konose sabiduria i pa konose lokura i bobedat; mi a realisa ku esaki tambe ta korementu tras di bientu.

¹⁸Pasobra den hopi sabiduria tin hopi tristesa, i oumento di konosementu ta resulta den oumento di dolo.