Read Papantla Totonac Eccliastes 12 Bible Online

Eccliastes 12 - Papantla Totonac bible

Eccliastes 12

¹Korda tambe riba bo Kreador den e dianan di bo hubentut, prome ku e dianan malu bin i e ananan yega serka, di kualnan lo bo bisa: "Mi no tin goso den nan";

²prome ku solo, lus, luna i e streanan bira skur, i e nubianan bolbe despues di yobida;

³ora ku e guardianan di e kas ta tembla, i e hombernan fuerte ta kana dobla, ora ku e muladonan ta stop di mula, pasobra nan ta poko, i esnan ku ta wak dor di bentana ta bira skur;

⁴ora ku e portanan pa kaya ta wordu sera i e zonidu di e mulamentu ta baha, i hende ta lanta ora parha kuminsa kanta, i tur e yu muhenan di kantika ta kanta poko-poko.

⁵Ademas, hende tin miedu di un luga haltu i di terornan riba kaminda; e palu di amandel ta floria, e tirakochi ta lastra pia i e ta perde apetit. Pasobra hende ta bai na su kas eterno, mientras ku yoradonan di morto ta kana ront den kaya.

⁶Korda riba djé prome ku e kabuya di plata wordu kibra i e komchi di oro wordu plecha, e kanika banda di e fuente wordu kibra na pida-pida i e wil na pos wordu kibra.

⁷E ora ei e stof lo bolbe na e tera ku el a bin for di dje, i e spiritu lo bolbe na Dios, Kende a duna esaki.

⁸"Banidat di banidatnan," e Predikado ta bisa, "tur kos ta banidat!"

⁹Ademas di ta un hende sabi, e Predikado a sina e pueblo konosementu tambe; i el a keda studia, a skudrina, i a kompone hopi proverbio.

¹⁰E Predikado a buska pa hana palabranan agradabel i pa skirbi palabranan di berdat na manera korekto.

¹¹E palabranan di hende sabi ta manera punta di heru, i maestronan di e kolekshonnan aki ta manera klabunan bon klaba; nan ta duna dor di un Wardado.

¹²I ademas, mi yu, sea spierta: skirbimentu di hopi buki ta un kos sin fin, i deboshon di mas na buki ta kansamentu di kurpa.

¹³E konklushon di tur loke ku a wordu tendi, ta: teme Dios i warda Su mandamentunan, pasobra esaki ta aplikabel na kada persona.

¹⁴Pasobra Dios lo trese tur echo na huisio, tur kos ku ta skondi, sea bon of malu. tj?