Read Papantla Totonac Eccliastes 2 Bible Online

Eccliastes 2 - Papantla Totonac bible

Eccliastes 2

¹Mi a bisa mi mes: "Bin awor, lo mi ponebo na prueba ku plaser. Pesei, gosa bo mes." I mira, esaki tambe tabata banidat.

²Di harimentu mi a bisa: "Ta lokura," i di plaser: "Di kiko e ta sirbi?"

³Ku mi mente mi a investiga kon pa stimula mi kurpa ku bina, mientras ku mi mente tabata guiami ku sabiduria, i kon pa retene lokura, te ora mi mira ki kos bon tin pa e yunan di hende hasi bou di shelu durante di e poko ananan di nan bida.

⁴Mi a hasi obranan grandi pa mi mes: mi a traha kasnan pa mi mes, mi a planta kunukunan di wendruif pa mi mes;

⁵mi a traha hofi i parke pa mi mes, i mi a planta tur sorto di palu di fruta den nan;

⁶mi a traha tankinan di awa pa mi mes, pa for di nan mi muha un mondi di palu ku ta kresiendo.

⁷Mi a kumpra esklabu homber i muhe, i mi tabatin esklabu ku a nase na kas. Tambe mi tabatin mas tantu baka i karne ku tur esnan ku tabata na Jerusalem prome ku mi.

⁸Tambe mi a montona plata i oro pa mi mes, i e tesoro di reinan i provinsianan. Mi a atkiri kantado homber i muhe pa mi mes, i e plasernan di homber--hopi konkubina.

⁹Anto mi a bira mas grandi i a surpasa tur esnan ku tabata na Jerusalem prome ku mi. Mi sabiduria tambe a keda ku mi.

¹⁰I mi no a nenga mi wowonan nada di loke nan tabata desea. Mi no a nenga mi kurason ningun plaser, pasobra mi kurason tabata gosa pa motibu di tur mi trabou; i esaki tabata mi rekompensa pa tur mi trabou.

¹¹Asina mi a konsidera tur mi aktividatnan ku mi mannan a hasi i e trabou ku mi a tuma pa hasi nan; i mira, tur tabata banidat i korementu tras di bientu. No tabatin probecho bou di solo.

¹²Asina mi a bira pa konsidera sabiduria, lokura i bobedat; pasobra kiko e hende ku ta bin despues di rei lo hasi, sino loke a wordu hasi kaba?

¹³I mi a mira ku sabiduria ta surpasa lokura, manera lus ta surpasa skuridat.

¹⁴Wowo di hende sabi ta den su kabes, ma e bobo ta kana den skuridat. I tog mi sa ku ta un destino tin pa nan tur dos.

¹⁵E ora ei mi a bisa den mi mes: "Manera ta sosode ku un bobo, asina lo sosode ku mi tambe. Pakiko mi tabata tantu sabi anto?" Pesei mi a bisa den mi mes: "Esaki tambe ta banidat."

¹⁶Pasobra ni di e hende sabi ni di e hende bobo no tin rekuerdo duradero, komo ku den e dianan benidero tur lo wordu lubida. Meskos ku hende bobo, hende sabi tambe tin ku muri!

¹⁷Pesei mi tabata odia bida, pasobra e trabou ku a wordu hasi bou di solo tabata penoso pa mi; pasobra tur kos ta banidat i korementu tras di bientu.

¹⁸Asina mi tabata odia tur e fruta di mi trabou ku mi a traha p'e bou di solo, pasobra mi mester lagu'e pa e hende ku lo bin despues di mi.

¹⁹I ken sa si e lo ta un hende sabi of un hende bobo. Tog e lo tin kontrol riba tur fruta di mi trabou ku mi a traha p'e dor di aktua ku sabiduria bou di solo. Esaki tambe ta banidat.

²⁰Pesei mi a desespera kompletamente di tur e fruta di mi trabou ku mi a traha p'e bou di solo.

²¹Despues ku un hende a traha ku sabiduria, konosementu i abilidat, e ta duna su propiedat na un hende ku no a traha ku esakinan. Esaki tambe ta banidat i gran maldat.

²²Pasobra kiko hende ta hana den tur su trabou i den su lucha ku kual e ta traha duru bou di solo?

²³Pasobra durante di tur su dianan su tarea ta doloroso i penoso; asta anochi su mente no ta sosega. Esaki tambe ta banidat.

²⁴No tin nada miho pa un hende ku kome i bebe i bisa su mes ku su trabou ta bon. Mi a ripara ku esaki tambe ta bin for di man di Dios.

²⁵Pasobra ken por kome i ken por tin plaser sin djé?

²⁶Pasobra na e persona ku ta bon den Su bista El a duna sabiduria i konosementu i goso, mientras ku na e pekado El a duna e tarea di rekohe i kolekta, asina ku E por duna na esun ku ta bon den bista di Dios. Esaki tambe ta banidat i korementu tras di bientu.