Read Papantla Totonac Eccliastes 3 Bible Online

Eccliastes 3 - Papantla Totonac bible

Eccliastes 3

¹Tin un tempu stipula pa tur kos. I tin un tempu pa tur evento bou di shelu:

²un tempu pa nase i un tempu pa muri, un tempu pa planta i un tempu pa ranka ku rais ku tur, loke ku a wordu planta,

³un tempu pa mata i un tempu pa kura, un tempu pa bash'abou i un tempu pa rekonstrui,

⁴un tempu pa yora i un tempu pa hari, un tempu pa tene rou i un tempu pa balia,

⁵un tempu pa tira piedra i un tempu pa piki piedra, un tempu pa brasa i un tempu pa keda sin brasa,

⁶un tempu pa buska i un tempu pa stop di buska, un tempu pa warda i un tempu pa tir'afo,

⁷un tempu pa sker for di otro i un tempu pa kose pega na otro, un tempu pa keda ketu i un tempu pa papia,

⁸un tempu pa stima i un tempu pa odia, un tempu pa guera i un tempu pa pas.

⁹Ki probecho e trahado tin di loke e ta traha duru p'e?

¹⁰Mi a mira e tarea ku Dios a duna e yunan di hende pa okupa nan mes kune.

¹¹El a traha tur kos apropia na su tempu. Tambe El a pone eternidat den nan kurason, sin ku hende por hana sa e trabou ku Dios a hasi for di prinsipio te na fin.

¹²Mi sa ku no tin nada miho pa hende, ku regosiha i hasi bon den su bida,

¹³i tambe ku tur hende por kome i bebe i mira e bon ku tin den tur su trabou--esaki ta e regalo di Dios.

¹⁴Mi sa ku tur loke Dios ta hasi lo permanese pa semper; no tin nada pa anadi i no tin nada pa kit'afo, pasobra Dios a hasi asina pa hende tin temor p'E.

¹⁵Loke ta, tabata kaba, i loke ta bin, tabat'ei kaba, pasobra Dios ta buska loke a pasa kaba.

¹⁶Mas ainda, mi a mira bou di solo: ku na luga di huisio--ta maldat tabatin einan, i na luga di hustisia--ta maldat tabatin einan.

¹⁷Mi a bisa den mi mes: "Dios lo huzga tantu e hende rekto komo e hende malbado," pasobra tin un tempo pa tur asunto i pa tur echo.

¹⁸Mi a bisa den mi mes tokante di e yunan di hende: "Siguramente Dios a pone nan na prueba pa nan mira ku nan ta meskos ku bestia."

¹⁹Pasobra destino di yu di hende i destino di bestia ta meskos. Manera esun ta muri, e otro tambe ta muri; di berdat, nan tur tin e mesun rosea i no tin bentaha pa hende riba bestia, pasobra tur ta banidat.

²⁰Tur ta bai na e mesun luga. Tur a bin di stof i tur ta bolbe na stof.

²¹Ken sa si rosea di hende ta subi bai ariba i si rosea di bestia ta baha bai abou den tera?

²²I mi a mira ku no tin nada miho pa hende ku gosa den su aktividatnan, pasobra esei ta su parti. Pasobra ken lo hib'e pa mira kiko lo sosode despues di dje?