Read Papantla Totonac Eccliastes 5 Bible Online

Eccliastes 5 - Papantla Totonac bible

Eccliastes 5

¹Warda bo pasonan ora bo ta bai na e kas di Dios, i hala serka pa skucha enbes di ofrese e sakrifisio di bobonan, pasobra nan no sa ku ta malu nan ta hasi.

²No sea pura pa papia ni laga bo kurason ta lihe pa menshona un asunto den e presensia di Dios. Pasobra Dios ta den shelu, i abo ta riba tera; pesei, laga bo palabranan ta poko.

³Pasobra sono ta bin dor di hopi esfuerso, i e bos di un bobo dor di hopi palabra.

⁴Ora bo hasi un promesa na Dios, no tarda pa kumpli kune, pasobra E no ta hiba gustu den hende bobo. Kumpli ku loke bo ta priminti!

⁵Ta miho bo no priminti, ku priminti i keda sin kumpli.

⁶No laga bo boka hasibo peka, i no bisa den presensia di e mensahero di Dios ku esei tabata un eror. Pakiko Dios mester ta rabia pa motibu di bo bos i destrui e obra di bo mannan?

⁷Pasobra den kantidat di sono i den kantidat di palabra tin banidat. Pesei, teme Dios.

⁸Si bo mira opreshon di pobernan i pervershon di hustisia i rektitut den un provinsia, no laga loke bo mira stranabo; pasobra un ofisial ta vigila otro ofisial, i tin ofisialnan mas haltu riba nan.

⁹Ademas, un rei ku ta kultiva kunuku ta un bentaha pa e tera.

¹⁰Esun ku ta stima plaka lo no keda satisfecho ku plaka, ni esun ku ta stima abundansia, ku su entrada. Esaki tambe ta banidat.

¹¹Ora kosnan bon ta oumenta, esnan ku ta konsumi nan tambe ta oumenta. Pesei, ki otro bentaha nan dononan tin, ku solamente wak?

¹²Sono di e homber trahado ta dushi, sea ku e ta kome poko of hopi. Ma barika-yen di e homber riku no ta lagu'e drumi.

¹³Tin un maldat penoso ku mi a mira bou di solo: rikesa ku ta wordu montona dor di su dono pa su mes dano.

¹⁴Ora ku e rikesa ei bai perdi dor di un mal invershon, i e dono engendra un yu homber, e ora ei no tin nada pa sostene e yu.

¹⁵Manera el a sali sunu for di barika di su mama, asina e lo bolbe meskos ku el a sali. E lo no hiba nada di e fruta di su trabou ku e por karga den su man.

¹⁶I esaki tambe ta un gran tragedia: eksaktamente manera un hende a nase, asina e ta muri. Pesei, ki probecho tin pa esun ku ta traha mata kurpa pa bientu?

¹⁷Henter su bida e tambe ta kome den skuridat ku gran tristesa, malesa i rabia.

¹⁸Esaki ta loke mi a mira ku ta bon i konveniente: pa kome, pa bebe i pa un hende gosa su mes den tur su trabou ku el a traha duru p'e bou di solo durante di e poko ananan di bida ku Dios a dun'e; pasobra esaki ta su rekompensa.

¹⁹Ademas, tur hende ku Dios a duna rikesa i propiedat, El a duna tambe poder pa kome for di nan, pa risibi su rekompensa i pa gosa den su trabou; esaki ta e regalo di Dios.

²⁰Pasobra e lo no rekorda e ananan di su bida masha, pasobra Dios ta ten'e okupa ku e alegria di su kurason.