Read Papantla Totonac Eccliastes 6 Bible Online

Eccliastes 6 - Papantla Totonac bible

Eccliastes 6

¹Tin un maldat ku mi a mira bou di solo i esaki ta hopi pisa riba hende--

²un hende ku Dios a duna rikesa, propiedat i onor, asina ku su alma no tin falta di nada di tur loke ku e ta desea, ma Dios no a dun'e poder pa kome for di nan, pasobra un stranhero ta gosa di nan. Esaki ta banidat i un gran aflikshon.

³Si un homber engendra shen yu i biba hopi ana, asina ku e dianan di su bida ta hopi, si su alma no keda satisfecho ku kosnan bon, i e no hana un entiero drechi, ami ta bisa: "Un meskram ta miho kune,

⁴pasobra esaki ta bin den banidat i ta bai den skuridat, i su nomber ta keda tapa ku skuridat.

⁵Maske e no ta mira solo i nunka e no sa nada, e tin mas sosiegu ku e homber ei,

⁶asta si e homber biba dos bes mil ana i no ta gosa di kosnan bon. No t'asina ku tur ta bai na e mesun luga?"

⁷Tur trabou di hende ta pa su boka, i tog su apetit no ta keda sasia.

⁸Pasobra ki probecho un hende sabi tin riba un hende bobo? Ki probecho un hende pober tin dor di sa kon pa kana entre e bibunan?

⁹Loke wowo ta mira ta miho ku loke alma ta desea. Esaki tambe ta banidat i korementu tras di bientu.

¹⁰Tur loke ta eksisti a wordu nombra kaba, i ta konosi kiko hende ta; pasobra e no por diskuti ku Esun ku ta mas fuerte kune.

¹¹Pasobra tin hopi palabra ku ta oumenta banidat. Kiko anto ta e probecho pa un hende?

¹²Pasobra ta ken sa kiko ta bon pa un hende durante di su bida, durante di e poko ananan di su bida bano? E lo pasa nan manera un sombra. Pasobra ta ken por bisa un hende kiko lo bin despues di dje bou di solo?