Read Papantla Totonac Eccliastes 9 Bible Online

Eccliastes 9 - Papantla Totonac bible

Eccliastes 9

¹Pasobra mi a tuma tur esaki na kuenta i a bin na konklushon ku hende hustu i hende sabi i nan echonan ta den man di Dios. Hende no sa si ta amor of si ta odio ta sper'e.

²Ta meskos pa tur hende. Tin un destino pa e hustu i pa e malbado; pa e bon, pa e limpi i pa e impuru; pa e hende ku ta ofrese sakrifisio i pa esun ku no ta ofrese sakrifisio. Manera e hende bon ta, asina e pekado ta; manera esun ku ta hura ta, asina esun ku tin miedu di hura ta.

³Esaki ta un maldat den tur loke ta wordu hasi bou di solo, ku tin un destino pa tur hende. Ademas, kurason di e yunan di hende ta yen di maldat, i tin lokura den nan kurason durante di henter nan bida. Despues nan ta bai serka e mortonan.

⁴Pasobra pa esun ku ta entre e bibunan tin speransa; siguramente un kacho bibu ta miho ku un leon morto.

⁵Pasobra e bibunan sa ku nan lo muri, ma e mortonan no sa nada, ni nan no tin rekompensa mas, pasobra ningun hende no ta korda mas riba nan.

⁶Di berdat nan amor, nan odio i nan zelo a perese kaba, i nan lo no tin parti mas den tur loke ta wordu hasi bou di solo.

⁷Bai anto, kome bo pan den felisidat i bebe bo bina ku kurason kontentu, pasobra Dios a aproba bo obranan kaba.

⁸Laga bo pananan ta blanku tur ora bai, i no laga zeta falta riba bo kabes.

⁹Gosa bida ku e muhe ku bo ta stima tur e dianan di bo bida di banidat ku El a dunabo bou di solo; pasobra esaki ta bo rekompensa den bida i den bo trabou duru bou di solo.

¹⁰Tur loke bo man hana pa hasi, hasie ku tur bo forsa; pasobra no tin ni aktividat ni planifikashon ni sabiduria den Seol, kaminda bo ta bai.

¹¹Atrobe mi a mira bou di solo: ku e kareda no ta pa esun mas lihe, i e bataya no ta pa e guereronan, ni pan no ta pa e sabinan, ni rikesa pa esnan ku tin disernimentu, ni fabor pa e hendenan ku abilidat; pasobra tempu i suerte ta alkansa nan tur.

¹²Ademas, hende no konose su tempu: manera piska kohl den un reda traishonero, i parha kohl den un trampa, asina e yunan di hende ta kai den trampa den un tempu malu, ora esaki bin direpiente riba nan.

¹³Tambe esaki mi a mira komo sabiduria bou di solo i el a impreshonami.

¹⁴Tabatin un stat chikitu ku poko hende den dje i un gran rei a bin kontra dje, a rondon'e i a konstrui baluartenan grandi kontra dje.

¹⁵Ma a wordu hana un homber pober i sabi den dje, i pa medio di su sabiduria el a libra e stat. Tog ni un hende no a korda riba e homber pober ei.

¹⁶Anto mi a bisa: "Sabiduria ta miho ku forsa." Ma sabiduria di e homber pober ta wordu despresia i su palabranan no ta wordu skucha.

¹⁷E palabranan di e hende sabi, tendi den kietut, ta miho ku gritamentu di un gobernante meimei di hende bobo.

¹⁸Sabiduria ta miho ku armanan di guera, ma un pekado ta destrui hopi kos bon.